PUNERARYA ang napadulngan sa usa ka ex-kapitan sa Davao City human giingong misukol sa operatiba sa Toril Police Station Huwebes sa gabii didto sa Purok 10, Barangay Lubogan, Toril, siyudad sa Davao.
Si Toril police station commander Police Major Michael Uyanguren nag-ila sa suspek nga si kanhi kapitan sa Barangay Callawa, Buhangin District Jorge Bution Tajo, alyas Kulot, 58, negusyante, taga Purok Lawaan, Callawa, ning dakbayan.
Sumala ni Uyanguren nga samtang gihimo ang operasyon, namatikdan sa suspek nga mga pulis ang iyang ka-transaksiyon maong mibunlot kini og pusil dayon gipamusil ang mga pulis.
Gilayong gi-neutralized ang suspek nga maoy hinungdan sa iyang kamatayon.
Nakuha sa posisyon sa suspek ang mga pakite sa gituohang shabu nga mibalor og P35,200, sakyanan, ug ang .45 nga pistola.
Gihaya na ang suspek sa iyang mga kabanay. (Jeepy P. Compio)