KIDAPAWAN CITY -- Gipangita pa sa pamilya ang dalagita nga biktima sa pagdagit sa mananggiti alas 3:15 sa kaadlawon, Huwebes, Marso 4.
Giila ang biktima nga mao si Renrose Orbino, 12, ug nagpuyo sa Barangay Midpapan 2, Pigcawayan, North Cotabato, samtang ang suspek giila nga si Abner Manife, 48, ug silingan sa biktima.
Sa taho nga gipatala sa pamilya ni Orbino ngadto sa Pigcawayan Municipal Police Station, nasayran nga kalit lang nahanaw ang dalagita sa ilang balay ug dunay nakakita nga misakay kini sa motorsiklo uban ang mananggiti.
Nasayran nga kanunay na mangomedya ang suspek ngadto sa dalagita nga iya kining panguyaban kay balo na siya.
Apan igo lang giyam-iran sa biktima gumikan wala siya makagusto ug tigulang na sab ang suspek.
Usahay makit-an pa ang biktima sa ilang mga silingan nga batohon ang mananggiti sa sobrang kasuko.
Dako ang pagtuo sa ginikanan sa dalagita nga posibleng gilumay sa suspek, hinungdan nga miuban kaniya og taban.
Nanawagan ang kapulisan sa Pigcawayan police nga kung dunay makakita sa duruha, itaho dayon kanila ug maluwas ang biktima.