Ang Cebu City Transportation Office (CCTO) ni-file og mga kaso ngadto sa korte batok sa 48 ka mga driver, kinsa napakyas pagbayad sa ilang traffic violations sa Pebrero.
Kini ang gipahibawo ni Lyntoni Sable, officer in-charge sa CCTO, human ang legal section sa iyang buhatan nisang-at sa sumbong ngadto sa Municipal Trial Court in Cities (MTCC) sa dakbayan sa Sugbo.
Ang mga kaso naa sa Branch 13 sa MTCC gisang-at.
“Ayaw ninyo ibaliwala ang mga na-issue nga citation ticket kay basin ma-surpresa na hinuon kamo og malutsan kamo og bench warrant. Ug mas hasol na hinuon ang pag settle ngadto sa korte,” tipik sa post sa CCTO Facebook page.
Gipahinumdoman ni Sable ang mga nadakpan nga drivers nga aduna silay 72 oras human sila nadakpan sa pag-resolba sa ilang violation para di sila mapasakaan og kaso subay sa City Ordinance 801 kun Cebu City Traffic Code nga gi-amendar sa C.O. 2491.
Mas dako na unya ang bayran nga multa.
Si Rolando Poliquit sa Legal Section sa CCTO nagkanayon nga matag-adlaw, labing menos 30 ka mga kaso ang ilang isang-at ngadto sa Cebu City Prosecutors Office gumikan sa kapakyas sa driver pag-settle sa iyang penalty.
Ang penalty sa traffic citation tickets sa disregarding traffic signs (DTS) nagkantidad og P1,000.
Apan kon masang-at na kini sa piskaliya ug maabot sa korte, mahimo na kining P3,000.
Dugang ni Poliquit nga kon dili makatambong ang driver nga ilang gipasakaan og kaso, ang korte moluwat og bench warrant aron pagdakop para iyang masulbad ang kaso nga adunay P1,000 nga pyansa.
Kon mabayran na ang P3,000 nga penalty, iuli ra usab sa korte ngadto sa driver ang gipiyansa nga kwarta.