Binayloay og higante

GIBUHIAN sa Brgy. Ginebra Gin Kings ang higanteng si Fil-Am Greg Slaughter alang sa one-on-one blockbuster trade nga naglambigit sab kang Fil-German Christian Standhardinger sa NorthPort Batang Pier.

Ang maong kasabutan naaprubahan na sa Philippine Basketball Association (PBA) trade committee niadtong Huwebes, Marso 4, 2021 ug mao kini ang nagtuldok sa mga tagnatagna kon asa paingon ang duha ka dekalidad nga big men.

Sa miaging tuig, nakadesisyon ang 7-footer nga si Slaughter nga dili una moduwa sa Ginebra gumikan kay wala nagkasinabot ang duha ka mga kampo kabahin sa contract extension sa produkto sa University of the Visayas (UV) Green Lancers.

Ang panagbaylo og puwesto nila ni Slaughter ug Standhardinger nahilakip sa labing dakong one-on-one trade sa kasaysayan sa PBA nga naghilambigit og big men.

Gihisama kini sa panagbaylo nila ni Mon Fernandez ug Abet Guidaben, Jerry Codinera ug Andy Seigle, Marlou Aquino ug Jun Limpot.

Sa inisyal nga kasabutan, ilakip unta ang sophomore guard sa Ginebra nga si Jerrick Balanza human gikuwestiyon ang kapabilidad ni Slaughter tungod kay sulod sab kini sa usa ka tuig nga wala nakaduwa og competitive basketball.

Hinuon, nagkasinabot ra ang duha mga kampo nga ipadayon ang one-on-one trade nga nagputol sa kalambigitan ni Slaughter sa Ginebra, nga nagpili kaniya isip No.1 overall pick niadtong 2013.

Gihasol man tuod og mga pagkaangol si Slaughter apan mabungahon gihapon ang iyang pagduwa sa Ginebra diin nakabira siya og upat ka mga kampiyunato, usa ka Best Player of the Conference award, luna sa Mythical First ug Second Teams, ug Rookie of the Year award. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph