NISIKAT karon sa Tiktok kining usa ka Vietnamese nga lalake nga gikatahong kasiyam nagparetoke sa dagway human nga gikataw-an atol sa job interview niadto.
Si Do Quyen, 26, di na mailhan nunot sa gwapong kausaban sa iyang dagway human sa mga retoke.
Daghang mga netizens ang nakurat sa iyang kausaban.
Sumala ni Quyen nga naglisod siya og pagpangita og trabaho niadto nunot sa iyang dagway.
Daghang nanaway ug nibiaybiay niya lakip na ang mga employer sa mga kompaniya nga buot niyang sudlan.
Didto siya nakahukom nga magparetoke gamit tanan niyang savings.
Di mominos sa 400 milyones dong o kapin sa P800,000 ang nagasto ni Quyen, kinsa usa ka makeup artist sa Saigon, sa iyang kausaban nga naglakip sa rhinoplasty, chin implants, porcelain veneers, lip reshaping, double eyelid surgery, ug lip implants.
“The first time I came home after plastic surgery, my parents did not recognize me,” paambit niya.
Base sa taho sa Oddity Central nga bisan sa kausaban sa dagway ni Quyen daghan gihapon ang nisaway sa iyang kausaban nga gi-upload niini sa social media.
Bisan pa man niini, siya niingon nga wa siya nagmahay sa iyang pagparetoke sanglit nakatabang man kini sa iyang self-confidence.
Giawhag pa niini ang iyang mga followers nga buhaton niini kung unsay makapalipay nila.