Gisaulog niadtong Miyerkules, Marso 3, ang ika-107 nga adlawng natawhan ni Arsobispo Camomot, ubos sa tema nga ‘Archbishop Teofilo Camomot: Gifted to Give.’ Ang selebrasyon gipahigayon sa Santa Teresa Chapel sa Valladolid, dakbayan sa Carcar, pipila ka metros gikan sa iyang lubnganan.
Kaparian sa Archdiocese sa Sugbo, mga madri, deboto ug local officials ang ninghugop sa maong dapit aron pagtambong sa Santos nga Misa. Duha ka misa ang gihalad. Ang una gipahigayon sa alas 10:00 sa buntag ubos sa pagdumala ni Most Rev. Midyphil Billones D.D. Ang ikaduha gidumala ni Rev.Fr. Mhar Balili sa pagka alas 4:00 sa hapon.
Kining duha ka santos nga misa akong nasaksihan kauban akong higala nga si Romulo Aying ug Cameraman Henryboy Marquez. Kabahin ni sa ika duhang episode nga among gitrabaho karon para sa Password TV sa Youtube channel. Samtang nga nagpahigayon ko og mga interview, o akong nasayran nga itandi sa miaging tuig minos ang gidaghanon sa mga tawo nga ningsalmot sa selebrasyon.
Matod ni Macaria Pantilgan usa sa manindahay og kandila didto, kung itandi sa miaging tuig, dako kaayo ang kibhang sa mga tawo nga nanimba. Nag-unang rason mao ang pandemiya. Si Macaria nihisgot nga nagsugwak ang mga tawo kaniadto. Ang uban nag gikan pa sa lagyo nga mga dapit. May mga gikan pa sa Mindanao ug ubang bahin dinhi sa Kabisay-an.
Dako akong pagtuo, gawas sa paghigpit panlihok lihok sa mga tawo, krisis sa panginabuhi maoy nag-unang hinungdan ngano nga nibahar ang paghugop sa mga tawo. Tugotan ta nga makabiyahe na ang mga tawo. Ang laing problema nga mas bug-at mao ang pamilite. Ang pagkaon ug ubang gastuhanan. Mao ni ang kamatuoran. Tungod sa pandemya, daghang negosyo ang nanira. Daghan ang nawad-an og trabaho. Gitinguha karon ang pagpabangon pagbalik sa ekonomiya, pinaagi sa pagsupak sa lain na sab nga lockdown.
Kung buhi pa si Arsobispo Camomot karon, sigurado nga dili siya mahimutang. Ang iyang gasa sa pagka mang gihatagun sa kanunay maambitan sa iyang mga parukyano. Ang sulti sa mga nakasinati niini niadtong buhi pa siya, way puas ang iyang pagtunol og tabang sa mga nanginahanglan.
Sa mga parukya diin siya madistino, kanunayng bukas ang ganghaan sa simbahan pagtabang niadtong nanginahanglan. Kadtong taga Talisay nga niingon nga namuwak ang iyang sakyanan sa mga nipa, kay may pamilya nga naguba ang balay og maoy iyang gihatdan niini, tipik lamang sa daghang tabang nga iyang gitunol sa mga nanginahanglan.
Bisan karon nga siya tua na sa laing kalibutan, daghan ang nihatag og testimoniya nga si Arsobispo Camomot padayon nga nagtabang nila. Mao ni padayon nga gituki karon ang iyang mga milagro.