Bukas na ang kagamhanan sa Lalawigan sa Sugbo sa pagdawat og applications sa tanan nga buot monegosyo sa food production.
Kini subay sa paglusad sa Enhanced Countryside Development (ECD) sa Probinsya sa Sugbo.
Atol sa paglusad sa ECD nga gipahigayon sa Hidden Valley, Barangay Lamac, Lungsod sa Pinamungajan sa Biyernes, Marso 5, 2021.
Si Gobernador Gwendolyn Garcia nagkanayon nga kinahanglan na nga mo-move on ang Probinsya tungod sa giingong pagkalusno sa ekonomiya sa lalawigan.
“This afternoon’s signing of memorandum of agreement was done with the three banks--Land Bank for the cultivation of crops and farms, DBP for the setting up of infrastructure for those who want to put up their own processing plants or even additional harvest facilities, and the Philippine Veteran’s Bank for our micro small and medium enterprises that may wish to expand and in need of additional operating capital,” matod ni Garcia
Atol sa maong kalihukan, nakighiusa usab si Presidential Spokesperson Harry Roque sa tinguha sa Probinsya pagtikang na gikan sa enhanced community quarantine (ECQ) ngadto na sa ECD aron inanay nga makabangon ang ekonomiya, mabalanse ang supply og may kita ang katawhan.
“The debate, my fellow Cebuanos continue. The debate will now go to how many people should be vaccinated before we completely open up the economy. I gave strong support in the opening of the economy yesterday and not tomorrow. But of course, we understand the degree of concern of our President,” dugang ni Garcia.
Ang ECD usa ka programa nga nahimugso atol sa nasinating pandemya sa nasod, nagtinguha kini sa pagtabang sa mga mag-uuma, manangat ug uban pa nga mga Sugboanon nga buot mopalambo sa mga pananom niini sama sa cassava ug yellow corn nga maoy in demand sa merkado.
Gawas niini, mahimo usab ang pagsugod sa aquaphonics o ang pagbuhi og isda ug pagpananom.
Kabahin kini sa tuyo sa kagamhanan sa pagsiguro nga dunay igong supply ang probinsya sa pagkaon ilabi na ning panahon sa krisis.
Gilauman nga makatabang usab kini sa mga mag-uuma nga molambo ang kita taliwa sa pandemiya.
Si Provincial Agriculturist Roldan Saragena nagkanayon nga moagi sa saktong proseso ang mga moapil.
“For as long as interesado ang farmers and fisherfolk kung unsa ang ilang i-venture nga livelihood, ato silang i-assist.Ilang i-submit ang ilang letter of application sa City Agricultural Offices then i-submit na sa Provincial Agriculture Office then i-screen ang iyang feasibility. Human ana ato nang i-forward sa banko,” matod ni Saragena atol sa presscon.
Ang tulo ka mga banko--PVB, LBP ug DBP--mopahuwam og pasiunang P20 bilyones nga apuron sa mga makapasar sa proseso sa ilang napili nga negusyo.
Apan gipahibalo ni PVB vice president Ofelia Oliva nga andam nga mopahuwam bisan pa og pila ka bilyon ang tulo ka mga banko aron inanay nga makabarog ang mga Sugbuanon.
Lakip na sa nakigtambayayong sa programa mao ang Department of Agriculture ug Bureau of Fisheries and Aquatic Resources (BFAR) nga migahin usab og igong pundo og suporta sa programa. (ANV)