Ang Cebu City Government mohatag og P600 milyones ngadto sa 80 ka barangay sa Dakbayan sa Sugbo karong 2021.
Kini ang gipahibalo ni Mayor Edgardo Labella kansang konsultasyon uban sa mga barangay kapitan nagpadayon aron hisgotan ang proyekto nga angay pundohan sa maong kwarta.
Gitahasan ni Labella sa paggama og guidelines silang City Councilor Raymond Garcia, City Administrator Floro Casas Jr. ug ang local finance committee aron masiguro nga dili mausik ang proyekto nga hapakan sa maong kantidad.
Si Casas nagkanayon nga gimanduan sila ni Labella sa pag-prioritize niini aron mahatag na kini ngadto sa 80 ka mga barangay ang ayuda.
Ang City Administrator niingon nga lakip sa ilang gipilian mao ang paghatag sa tibuok ayuda o tungaon kini, P300 milyon sa unang batch ug laing P300 milyon sa ikaduhang batch ning tuiga.
Ang pagbahig sa ayuda diin posible nga parehas ang kantidad nga ihatag o depende sa populasyon sa barangay. (PAC)