Gipasaka na ang kaso sa piskaliya kagahapon, Marso 5, batok sa duha ka mga suspek nga nadakpan sa sa entrapment operation sa kapulisan sa milabayng adlaw sa gikatahapang mangilkilay uban sa peke nga abogado.
Matod ni Police Major Glenn Hife, nangulo sa entrapment operation, nga ang upat ka mga kaso ang gipasaka batok kang Marythel Nicolette Niere, 34, taga Palm Hills Subdivision sa Barangay Basak sa Dakbayan sa Mandaue.
Lakip usab nga gipasakaan og kaso ang nagpailang Atty. Farhad Akmad, matod pa legal officer sa EC Labella Law Office, apan nasuta nga peke kini.
Ang tinuod usab nga pangan ni Akmad mao si Reihan Hunti, 32, taga Zamboanga City ug dili abogado.
Matod ni Hife nga si Niere ug Hunti pareho nga gipasakaan og kaso nga falsified of documents, concealment of true name, ug syndicated estafa subay sa gipasaka nga kaso ni Cebu City Administrator Floro Casas Jr.
Kining duha ka mga dinakpan ang nigamit sa pangan ni Casas nga giingong maoy gisugo, matod pa, nga mokuha sa mga matag bahin sa reklamante kon dunay usa ka proyekto aron mapadali ang pagproseso ug dunay kasiguroan ang usa ka kontraktor nga mapaingon ngadto kaniya ang proyekto bugti sa salapi.
Apan nabutyag ang maong modus nila ni Niere ug Hunti hinungdan nga giseryuso niini ang pagpasaka og kaso ang duha.
Gipasaka ang kaso niadtong Marso 3, 2021 pinaagi savirtual inquest proceedings.
Anaa pa sa selda ang mga dinakpan samtang nagpaabot sila nga mabalhin sa Cebu City Jail.
Gawas sa upat ka mga kaso nga napasaka ni Casas ngadto na sa korte lauman pa nga dunay laing upat pa ka mga indibidwal ang mopasaka og kaso nga nabiktima nila. / BBT