Tunga sa adlaw ang trabaho sa mga kawani sa Cebu City Government kagahapon, Marso 5, aron paghatag og kahigayonan sa paglusad sa massive disinfection sa Cebu City Hall gumikan sa pagpositibo sa Covid-19 sa pipila ka mga kawani.
Si Mayor Edgardo Labella nagkanayon nga adunay mga empleyado gikan sa Department of Engineering and Public Works (DEPW), Office of the Buidling Official (OBO), City Accounting Department, Sangguniang Panlungsod Office ang nagpositibo sa virus.
Wala na nihatag og gidaghanon sa mga napositibo ang mayor kon pila ka mga kawani ang natakboyan sa sakit sa nahisgotang mga departamento.
Gumikan niini, gimanduan ni Labella si City Administrator Floro Casas Jr. sa pagluwat og memorandum kagahapon aron papaulion ang mga empleyado ug ipahigayon ang disinfection sa building.
Matod ni Labella nga kon dili mahuman sa Biyernes, ipadayon ang disinfection sa tanang opisina sa City Hall karon, Marso 6, ug Dominggo, Marso 7.
Nasayran sa Superbalita Cebu nga gipa-Covid test sa mayor ang mga staff sa Office of the Mayor isip preparasyon sa iyang pagbalik sa sunod semana.
Adunay duha ka staff sa iyang opisina ang nagpositibo sa Covid-19 tulo na ka semana ang nakalabay.
Giabisohan usab siya sa iyang mga doktor nga dili mag-opisina, gawas sa iyang pangidaron nga 70, aduna sab siyay ear infection nga hinungdan sa iyang pag-work from home. / (PAC)