Gilibkas na ni Lapu-Lapu City Mayor Junard Chan ang number coding sa mga sakyanan ug quarantine pass sa alas 11:59 sa Biyernes sa gabii, Marso 5, 2021.
Nabantayan ni Chan ang hinayhinay nga pagkanaug sa bag-ong mga kaso sa coronavirus disease (Covid-19) matag adlaw sa siyudad.
“Atong nabati nga dili gayud kapugngan nga aduna kitay importanteng mga lakaw kung diin kinahanglan kita nga mogawas sa panimalay. Butang nga atong nasabot kay kinahanglan nga ipadayon gihapon nato ang atong normal nga kinabuhi para mabalik ang kalagsik sa atong ekonomiya,” matod ni Chan sa iyang social media post.
Si Chan niingon nga iyang gipatuman ang number coding dihang nabantayan sa Siyudad ang paspas nga pagsaka sa mga kaso sa Covid-19 sa Pebrero.
Bisan pa ning iyang paglibkas, siya nipahimangno sa mga Oponganon ug sa mga mobisita sa siyudad nga estrikto nilang ipatuman ang pagpasul-ob sa mask ug face shield.
Kadtong masakpang nakalapas pamultahon og P1,000 ug kon di makabayad, mag community service.
Gipahimangnoan na usab ni Chan ang mga drayber sa publikong mga sakyanan sa di pagpasakay og mga tawo nga di magsul-ob og mask ug face shield.
Matod sa mayor nga niadtong Huwebes, Marso 4, 2021, 332 ka mga tawo ang nasikop sa Siyudad tungod sa mao nga mga kalapasan.
“Apan, importante nga kung mogawas kita sa atong panimalay, gikinahanglan gihapon kita nga magsul-ob og facemask ug faceshield sa kanunay. Kung walay igong rason nga mogawas, akong lang gyud nga gihangyo nga magpabilin na lang sa sulod,” dugang ni Chan. (REV)