Exclusive bike lane ibutang sa SRP

LUWAS NA UNYA: Kon mahuman na kining mao nga 10-metros nga bike lane, luwas na unya nga mangagi ang mga biker sa South Road Properies, matod ni Sugbu Bike Board chairman Gerry Carillo. Motadlas kini padung sa Dakbayan sa Talisay. / GIKAN SA FB PAGE SA SUGBO BIKE BOARD
LUWAS NA UNYA: Kon mahuman na kining mao nga 10-metros nga bike lane, luwas na unya nga mangagi ang mga biker sa South Road Properies, matod ni Sugbu Bike Board chairman Gerry Carillo. Motadlas kini padung sa Dakbayan sa Talisay. / GIKAN SA FB PAGE SA SUGBO BIKE BOARD

Exclusive bike lane nga molagbas sa South Road Properties gikan sa Dakbayan sa Sugbo padung sa Dakbayan sa Talisay gisugdan na og trabaho.

Ang proyekto nga gitawag og mobility lanes, maagian usab sa ubang non-motorized nga mga sakyanan, matod ni Sugbo Bike Lanes Board chairman Gerry Carillo.

Magkonektar usab kini tali sa Siyudad sa Sugbo ug Talisay nga maggamit lang og biseklita.

Matod ni Carillo nga ang lane dunay gitas-on nga di molapas sa tulo ka kilometro ug dunay gilapdon nga 10 ka metro.

Wa siya masayod kon pila ang magasto sa proyekto kay ang pundo nga gigamit tipik sa gahin sa P100 milyunes sa Department of Public Works and Highways (DPHW) alang sa bike lanes sa tri-cities ug Talisay City, diin ang Cebu City nangayo og P50 milyunes.

Matod ni Carillo sa interbyu sa Superbalita Cebu nga dunay tag lima ka metro ang magamit sa mopadung sa siyudad sa Sugbo ug Talisay.

Ang lane naa sa tuo nga habig sa Cebu South Coastal Road (CSCR) kon magpadung sa Dakbayan sa Talisay.

Wa siya mobutyag kon kanus-a kini mahuman, apan ang lanes luwas gikan sa mga sakyanan nga kusog managan kay wa kini ibutang nga tipik sa karsada.

Sa samang higayon, iyang gibutyag nga iyang gihangyo ang SRP management nga ang tanang locators sa SRP magbutang og bike lanes, bike racks ug bike parking sa ilang mga tugkaran.

BOLLARD

Nibutyag usab si Carillo nga butangan og plastic bollards ang hapit tanan nga mga bike lane aron di gamiton nga parking area, butangan og vulcanizing shop ug uban pa.

Ang pundo alang sa bollards nagagikan sa DPWH, Siyudad sa Sugbo nga nigahin og P10 milyunes ug Department of the Interior and Local Government (DILG) nga niamot og P16 milyunes.

Matod ni Carillo nga ilang gipangayoan ang DILG og pundo kay ang ahensya nagdasig usab sa mga local government unit (LGU) sa pagbutang og bike lanes ning panahon sa pandemic.

Matod niya nga mamutang usab sila og mga bike rack sa strategic nga mga lugar, diin ang ilang prayoridad karon mao ang Plaza Sugbo, Plaza Independencia ug dagkong mga tunghaan. / REV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph