Astrazeneca, Covovax paliton sa Cebu City

Nakapadala na og letter of intent (LOI) ang Cebu City Government ngadto sa Astrazeneca ug Covovax nga maoy palitan sa mga bakuna batok sa Covid-19 sa Dakbayan sa Sugbo.

Kini ang gipahibawo ni Mayor Edgardo Labella human usab ang Konseho nihatag na og pagtugot sa executive department pag-negotiate tali sa duha ka vaccine manufacturer.

Si Konsehal Raymond Garcia, majority floor leader ug chairman sa committee on budget and finance, nagkanayon nga P200 milyones ang gitugot sa Konseho nga gastuhon para sa pagpalit og bakuna gikan sa P400 milyones nga gigahin alang sa maong programa.

Wa pa matino kon pila ka doses ang mapalit sa P200 milyones sanglit magdepende sa presyo nga mauyonan tali sa Siyudad ug duha ka manufacturers, dugang ni Garcia.

Ang mayor nagpasalamat ngadto kang Presidente Rodrigo Duterte ug vaccine czar Carlito Galvez sanglit niabot na ang 7,200 doses sa Astrazeneca nga maoy gisaad ug dugangan pa sa mosunod nga semana.

Matod ni Labella nga padayon nga makapili ang mga Sugbuanon sa bakuna nga ilang gusto, labi na kon moabot na ang Covovax nga maoy kauban sa Astrazeneca nga paliton sa dakbayan.

“Ang Astrazeneca, as early as two months ago, nakapadala na man ta og letter of intent,” matod sa mayor.

Si Labella niingon nga anam-anam lang una ang pagpalit sa Siyudad kay duna may moabot nga mga bakuna dinhi gikan sa nasudnong kagamhanan.

Ang Cebu City adunay gibana-bana nga 1,000,000 ka mga tawo ug base sa pakisusi sa DOH 7, naay 700,000 kanila gusto nga magpa bakuna.

Ang mayor gusto nga magpabakona, apan ang guidelines sa DOH, sa Astrazeneca nga vaccine, dili pa mahimo nga magpabakona ang 59 anyos pataas.

“Sa akong bahin, magpabakuna gyud ko,” kon itugot unta sa mga senior citizen, matod ni Labella.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph