Vallena: Bike lanes

Di ba naghisgot ko dinhi nga dunay bike lanes nga gigahinan sa Department of Public Works and Highways (DPWH). Naa gyud diay ug kini gahinan og P140 million. Duna nay contractor, kana kon tinuod tong akong nabasahan sa usa ka post sa Cebu Road Heroes Facebook page. Anha kini ipamutang sa Dakbayan sa Lapu-Lapu, Mandaue, Cebu City ug Talisay.

Kaanindot kon ang pinili nga mga karsada sa upat ka mga siyudad, labina niadtong main nga mga dan, butangan og lanes alang sa mga trabahante nga nagtindak kada adlaw. Kining mga tawhana maoy angay nga iprayoridad kay kadaghanan ani nila, ordinaryong mga mamumuo apan maoy gisaligan sa ilang mga pamilya.

Kuyaw man gud ang biseklita kon magpataka ka lang og padagan sa karsada kay daghan na ang mga motorsiklo ug four-wheeled nga mga sakyanan kon itandi kaniadto. Nagkadaghan sab ang dagkong mga truck sa kadalanan.

Ang nakaanindot ra sa biseklita kay mas duna kay control kon itandi sa mga motorsiklo nga dunay makina. Kon mga lungag usab nga lawom sa karsada, mas mo survive ang biseklita tungod kay mas dagko og diameter ang mga ligid itandi sa mga motorsiklo ug scooters.

LIKAY SA DISGRASYA

Pipila ka mga buwan ang nakalabay, sunodsunod ang mga aksidente nga nalambigitan og two-wheeled ug four-wheeled nga mga sakyanan. Dunay biseklita ug duna say motorsiklo. Mas naglabi ang mga motorsiklo sa mga aksidente kay mas daghan ang danghag.

Usa sa komon kaayo nga hinungdan mao ang pagtupad sa mga nagmotorsiklo o nagbiseklita sa dagkong mga sakyanan, sama sa trailer trucks. Magdaku ang sakyanan, magkadaghan usab ang ilang blind spots. Sa kilid ug atubangan, dunay spots ang mga trak nga ang driver di kakita.

Busa likayi ang kilid sa mga trak kay kon di ka masabdan, mapiit ka. Magbantay ka usab sa atubangan kay dunay portions nga nasampunganan ang panan-aw sa drivers, busa di siya makakita. Mao nga mahibung ka nga dunay naligsan kay wa makakita ang driver.

Laing hinungdan sa aksidente mao ang pagkapyot sa sakyanan. Mao ni ang naandang sala sa mga biker nga naanad na ani nga buhat. Nagtuo man gud sila nga cool kaayo ni nga buhat. Nahinundmom ko sa usa ka road biker sa Metro Manila nga naligsan sa usa ka trak kay natumba samtang nagkupot sa sakyanan. Naigo tingali og libaong ang iyang biseklita, natumba ug siya naligsan sa trak.

Kon usa ka sa anad ani, undangi ni kay nag court ka sa kamatayon o pagkaangol.

TUMAN

Laing usa sa mga hinungdan sa mga aksidente mao ang di pagtuman sa balaud sa trapiko. Kapila na ba ko makakita og mga biker nga yano ra kaayong motabok sa karsada nga klarong paglapas sa balaud sa trapiko. Molabang nga way tan-aw tan-aw sa dan.

Aron malikayan ang disgrasya, bisan nagbiseklita kita, motuman ta sa balaud sa trapiko. Maora bag kitay hawod sa dan. Ang dan para sa tanan. Motuman alang sa atoang kaluwasan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph