ATO na kining gihisgutan kaniadto pa kalabot niining paghibalik ni Greg Slaughter sa kampo sa Barangay Ginebra gikan sa iyang pagkagiw didto sa Amerika human nasagmuyo sa hugonhugon nga siya i-trade ngadto sa laing team.
Sa dihang nakahukom ang 7-footer nga kanhi sentro sa University of the Visayas (UV) Green Lancers nga mobalik kini sa Pilipinas, nangayo kini og pasaylo sa management sa Ginebra San Miguel ug mipadayag kini sa iyang kaandam nga mobalik og duwa sa team - butang nga gihangop usab ni coach Tim Cone.
Tuod man, pilay dagan sa istorya, nahulma ang kasabutan ug wa magdugay nakapirma ra gihapon siya og balik sa Ginebra, ang team nga iyang naserbisyohan sulod sa walo ka tuig ug maoy naghimo kaniyang no. 1 overall pick sa 2013 PBA Draft.
Daghan ang nagtuo nga everything is doing well tali kaniya ug sa Ginebra management ug magpabilin siyang magsul-ob sa Ginebra jersey sa umaabot pang mga conferences o katuigan.
Pero sa kalit lang niabot gyud ang butang nga sa una maoy iyang kahadlokan. Kon kini hugonhugon lang kaniadto, karon nahinayon na gyud.
Gi-trade siya ngadto sa NortPort baylo kang Christian Standhardinger.
Daan na tang nakatimaho niini nga mao gyud ni mahitabo tungod kay sa dihang gikuhaan si Alfrancis Chua, ang team manager sa Barangay Ginebra San Miguel ug sports director sa San Miguel Corporation, kalabot sa presensiya ni Slaughter sa nasod mora man og dili na gyud siya interesado.
Naigo man sab gud ni si Chua sa pagsaway ug pagbasol sa kalit nga pagbiya ni Slaughter sa Ginebra tungod kay wala lagi hikaya niini ang pagpa renew sa kontrata.
Apan napamatud-an man hinuon sa Ginebra nga bisan tuod sa kalit nga pagkawagtang ni Slaughter, nakampiyon man gihapon ang Kings sa niaging bubble-type nga All-Filipino conference.
Buot ipasabot nga dili na sila mahinugnan ni Slaughter hinungdan nga wala na usab sila magpanuko sa pagbuhi niini.
Ning maong kalambuan, mao na kining higayon nga dawaton ni Slaughter ang dakong hagit sa iyang karera.
Sa gikaingon ko na, mas makaayo ug haom kaniya kon adto siya sa team nga nagkinahanglan sa iyang serbisyo ug tabang kay sa team nga wala na kinahanglana ang iyang presensiya.
Gikataho nga samtang didto sa US nagpahanas si Slaughter sa iyang abilidad ug kini maoy iyang gamiton aron pagmatuod nga anaa pa siyay ikabuga. Ipuga niya ang tanan niyang nakat-onan aron ipakita ngadto sa Ginebra ang dako nilang kasaypanan. Kana kon duna pa siyay ikabuga.
* * *
Sa NBA, usa na ka unrestricted free agent si Blake Griffin karon human gi buyout ang iyang kontrata sa Detroit Pistons.
Libre ug daghan nang mga teams nga interesado sa iyang serbisyo pero morag ang Brooklyn Nets maoy porsigido kaayo ug maoy nakapabor.
Kon mahinayon ni, mosamot og kalig-on ang Nets ani. Di na man tuod susama kaniadto ang lihok ni Griffin tungod sa sunodsunod nga injury, apan dako kaayo kini siya og ikatabang isip role player.
Hulga gihapon siya sa opensa ug depensa ilabi na sa ilawom nga bahin.
Gawas sa Nets ang uban nga kursonada nga mokuha niya mao ang Miami Heat, Golden State, Boston Celtics, Los Angeles Clippers ug Los Angeles Lakers. (jun.migallen22@gmail.com)