KASAGARAN sa mga mag-birthday, magpa-party sa ilang balay o sa hotel, beach resort o sa ubang mga dapit suroyanan.
Alang kang Em “Golden Li Ly” Aspiras, lahi usab ang iyang paagi sa pagsaulog sa iyang adlaw nga natawhan karong tuiga.
Inay nga magpa-party, gisaulog niya ang iyang birthday pinaagi sa camping kuyog ang mga cast sa series nga iyang gi-produce.
Ang tulo ka adlaw nga camping gisugdan niadtong Pebrero 13 hangtod sa Pebrero 16. O usa ka semana human sa iyang 37th birthday niadtong Pebrero 6.
Gihimo kini sa usa ka pribadong propiyedad sa Barangay Gaas, lungsod sa Balamban.
“I really want to go to the province. So, I decided to celebrate it with the bloggers, friends and family. Sakto nahuman among shoot sa series,” paambit ni Em.
Nagustohan kaayo ni Em ang lokasyon kay naa sila nag-camp duol sa mga bungtod.
Si Em ang nagsuwat ug ang nag-produce sa Teens and Engage, usa ka series nga makita sa Youtube.
Usa siya sa mga nagpaluyo sa Timpro Films, ang nagbuhat sa maong lilas.
Alang niya, espesyal usab ang iyang birthday karong tuiga kay ni-greet niya ang iyang mga higala sa showbiz industry sama nila ni Liza Soberano, Angelica Panganiban, Kim Chiu, Nikki Valdez ug uban pa.
Si Em lumad nga taga Mindoro apan dinhi na siya sa Sugbo nagpuyo sud na sa 15 ka tuig. (SCG)