Mongaya: Daluz ug Panaghiusa
NAKALITAN ko sa balita nga nihawa si Joey Daluz sa Barug nga gipangulohan ni Bise Mayor Mike Rama ug namahayag nga buhi-on pagbalik ang Panaghiusa.
Akong pangagpas nga ang Panaghiusa mao unya ang pundok nga hugopan sa mga loyalista nilang Mayor Edgar Labella nga paluyohan nilang Presidential Assistant Mike Dino.
Abi man gud nako nga ang mga naa sa kampo ni Mayor Labella ug Dino adto mohugop sa Kugi Uswag Sugbo kun Kusug nilang Konsehal Raymund Garcia. O basin, mahimo silang kaalyado.
Nakahinumdom ko nga ang Panaghiusa ang grupo ni Inday Nita Cortes-Daluz, Celing Fernan, ug Tony Cuenco dihang ningdagan ug nakadaog isip mga sakop sa Batasang Pambansa sa eleksyon sa 1984.
Paghuman sa Edsa 1, mao sab kini ang grupo nga nakapadaog sa mga Osmeña sa piliay sa 1988. Niadtong tungora, si Sonny Osmeña ang giingon nga prime mover.
Ambot kon nangunsulta o suportado ba kining lakang ni Daluz ni Panaghiusa legal counsel Al Alerre ug Panaghiusa Youth Sector rep Totol Batuhan.
Duna man guy constitution and by-laws ang Panaghiusa ug dili kini mahimong kabilin sa inahan ngadto sa anak, matod pa ni Totol dihang akong gipangutana kabahin niining maong kalamboan sa pulitika sa Syudad sa Sugbo.
Tingale, kining mga bag-ong batch sa mga reporter karon wala masuweto sa kaagi sa Sugbo. Mas maayong manginterbyu sila kabahin niini kay motumaw pa kining maong punto sa umaabot nga kalamboan sa politika sa syudad.
Alang kanako, mas haom kon si Konsehal Raymund maoy moduso sa Kusug nga namugna kaniadtong 2001 dihang gitukod kini nilang Mayor Alvin Garcia ug DOTC Secretary Sonny Garcia.
Sa pagkakaron, nagtuo ko nga padung na gyud sa pagbuwag kining Partido Barug ni Mayor Labella ug Bise Mayor Rama. Kay kampo man ni Rama ang naghupot niini, bakikaw alang sa mayor nga magpabilin.
Karon di kalikayan nga maninguha na nga modagan sa pagkamayor si Rama. Samtang moinsister si Mayor Labella nga magpabilin sa poder, nagpabilin ang paghupong ug paglagom sa iyang nawong inig press conference.
Manghinaot na lang ko nga magkasinabot silang duha bisan niining pagpalit og mga bakuna alang sa Syudad sa Sugbo. Makabawi pa kining duha kon magkasinabot lang kay sigi man sab og palpak ang mga tiguwang nga tua sa kaulohan.
Murag nalipay kaayo sila nga naay gamayng hinatag alang sa mga kabus nga nasud ang Sinovac ug Astrazeneca nga naabot. Naunsa na kaha kadtong atong giutang alang sa pagpalit og mga bakuna?
Gani, matod ni Presidente Rodrigo Duterte, sa 2023 pa kita makalingkawas sa pandemya. Makaapas ra kining nagyaya ug magmika nga liderato sa Syudad sa Sugbo. DM sa @anol_cebu.