Sa guidelines sa World Health Organization (WHO) nga maoy nagdumala sa Covax facility nga nagseguro nga mahatagan ang tanang mga nasod sa anti Covid vaccine, ang mga medical frontliner, senior citizen ug kadtong dunay mga sakit nga nahulga sa Sars-CoV-2, maoy unang prayoridad sa bakuna.
Apan dunay mga opisyal nga nagpabakuna, sama kang retired Major General Melquiades Feliciano, chief implementer sa Inter-Agency Task Force sa Visayas. Tumong sa mga opisyal ang pagpakita nga luwas ang mga bakuna.
Daghan pa gani unta ang gustong magpabakuna, apan naa man say kaugalingong guidelines ang kagamhanan nga ang mga 59 anyos pataas di pa mahimong mabakunahan.
Bisan si Cebu City Mayor Edgardo Labella gustong magpabakuna, apan ang nakababag kaniya mao ang age restriction gihapon nga gitakda sa nasudnong kagamhanan nga nasukwahi sa polisiya sa WHO.
Mag-usa na ka tuig sukad gisugdan ang quarantine restriction sa Sugbo. Daghang mga negusyo ang nanira. Naay nakabalik, apan gamay na lang ang mga trabahante. Naa say wa na malabalik, nidayon sa pagsira.
Naundang usab ang mga klase ug kadaghanan sa mga graduation gipahigayon nga virtual. Wa na sab kakita ang mga Sugboanon og mga salida nga sulod sa mga sinehan gitan-aw. Bisan ang pagkaligo sa beach gidili pa kaniadto. Kon makit-an dakpon.
Di ba kapoy kaayong huna-hunaon kining mga hitaboa? Di ba makapahugno nga maghuna-huna nga nausab ang normal nga kinabuhi sa paglihok, lulinghayaw, pagbiyahe ug uban pa? Nawala ang naandan sa kagawasan.
Unya, usa ra ang agianan padulong sa anam-anam nga paghibalik sa normal, ang pagpabakuna. Ang pagdumili sa pagpabakuna, bisan sa pipila, babag kini sa paghibalik sa normal nga kinabuhi. Unya karon nga naa na ang bakuna, nganong mahadlok man ta?