ATOL sa pagsulod sa Fire Safety Month sa Marso, ang Visayan Electric nitugyan ngadto sa siyam ka pampublikong mga tunghaan sa 419 ka rewired nga mga classroom sulod sa iyang franchise area.
Pinaagi niini, mapanalipdan ang mga tinun-an ug magtutudlo gikan sa sunog.
Mga beneficiary sa P11 milyunes nga “Upgrading of Electrical Systems in Schools Project” mao ang Pardo Extension Elementary School, Hipodromo Elementary School, ug Inayawan Elementary School sa Cebu City; South Poblacion Elementary School sa San Fernando, Naga High School sa Naga City, Cansojong National High School sa Talisay City, Don Gerardo LL. Ouano Mandaue National High School sa Mandaue City, Lamac Elementary School sa Consolacion, ug Catarman Elementary School sa Liloan.
“Despite the start of the pandemic and the implementation of lockdowns last year, which limited movement within our franchise area, we made it a point to continue our commitment to ensure the safety of our public schools,” matod ni Engr. Raul C. Lucero, presidente ug chief operating officer sa Visayan Electric.
Karaang mga linya ug gamit sa kuryente, naa man sa tunghaan o balay, dunay taas nga kahigayunan nga mag-overheat.
Busa, gikinahanglan ang pag-upgrade sa system gamit ang modernong mga gamit aron maminusan ang kahigayunan sa electrical fires ug uban pa.
Nagsugod ang rewiring sa unang quarter sa 2020 apan gihunong atol sa lockdown gikan sa Marso ngadto sa Mayo.
Tungod sa estriktong health protocol, ang pagtrabaho sa rewiring nipadayon niadtong Hulyo ug nahuman sa Disyembre.
Ang nahuman lang ang pag rewire sa wa pa gipatuman ang lockdown mao ng Pardo Extension Elementary School ug Hipodromo Elementary School.
Si Dr. Salvacion L. Oporto, principal sa Hipodromo Elementary School, mapasalamaton nga ang rewiring natapos sa hustong panahon tungod kay ang tunghaan gigamit nga Barangay Isolation Center hangtod sa Agusto sa miaging tuig. (PR)