PATAY na nga nadangat sa tambalanan ang usa ka tricycle driver sa dakbayan sa Lapu-Lapu human pusila sa wa mailhing mamumuno pasado alas 9 sa Biyernes sa gabii, Marso 5, 2021 sa Sitio Kagudoy, Barangay Basak, Dakbayan sa Lapu-Lapu.
Ang biktima giilang si Saidato Masarong Saumay, 25.
Si Saumay nagmaneho sa iyang motorsiklo dihang kalit nga gipusil sa wa mailhing mamumuno tumong sa ulo ug ubang bahin sa lawas.
Matod ni Police Staff Sergeant Fredo Pedrosa sa Marigondon Police Station sa Lapu-Lapu City Police Office (LCPO) nga naglisod sila sa ilang imbestigasyon sanglit way mobarog nga saksi.
Wala usab silay nahipos nga mga kabhang ug basiyo sa armas de fuego sa crime scene aron unta mahimong ebidensya.
Sutaon pa usab sa kapulisan kon duna bay kuha sa closed circuit television (CCTV) sa dapit nahitaboan nga makatabang sa ilang imbestigasyon.
“Wala ni siyay pasahero paghitabo ug nagbiyahe agi sa Kagudoy,” matod ni Pedrosa.
Gawas kang Saumay, usa ka Rachel Silva Gabas, lumolupyo sa Brgy Maguikay, Dakbayan sa Mandaue napagan atol sa pagpamusil.
Kini human nga naatol siya niagi sa dapit nahitaboan luwan sa iyang gimanehong motorsiklo. Wa ra hinuon magrabehan, sumala pa sa kapulisan.
Si Saumay maoy ikadung Muslim sa dakbayan nga gipusil sulod lang sa duha ka semana. (GCM)