GIAWHAG sa Lapu-Lapu City Tourism Cultural and Historical Affairs Commission (TCHAC) ang gagmayng hotels ug resort sa dakbayan sa pagpa accredit sa Department of Health (DOH-7) ug Department of Tourism (DOT-7) aron mahimong isolation facility sa mga ganahan mopaubos sa quarantine sa mga hotel.
Kini ang gibutyag ni Cindi-King Chan, chairman sa TCHAC, gumikan kay sa pagkakaron, gamay pa usab nga mga hotel ug resort sa dakbayan nga accredited sa DOH-7 ug DOT-7.
Matod ni Chan nga angay kini pahimuslan sa mga hotel ug resort owners sanglit dili pa usab in-ana kataas ang ilang booking ning panahona.
Sa pagkakaron adunay pito ka mga hotel ug resort sa dakbayan nga mahimong adto magpa quarantine ang mga mag positibo sa coronavirus disease (Covid-19).
“Understandable kay most of us are in the leisure industry man pud. So, more on tourists, so limited ang mo apply. But we are encouraging gihapon kay kuwang paman as stated sa Department of Tourism," pasabot ni King-Chan.
Malaumon hinuon siya nga inanay nang mosaka ang booking sa mga hotel ug resort nunot usab niining pagwagtang na sa kagamhanan sa swab test isip usa sa mga rekisitos sa mga dumuduong sa dakbayan.
Nadesisyonan kini ni Lapu-Lapu City Mayor Junard “Ahong” Chan aron paghatag og kasayon sa mga dumuduong lakip na manguliay sa dakbayan niining panahon sa pandemya.
Klarohon pa hinuon sa mayor kon mahimo bang malakip usab sa bag-ong kamandoan ang mga manguliay gikan sa gawas sa nasod.
Ang gipahugtan karon sa kagamhanan mao ang pagpatuman sa public health and safety standards (PHSS) sa mga komunidad sa kabarangayan.
Diin ang di magsul-ob og face mask, face shield ug wa pag-obserbar sa physical distancing paisyuhan og citation ticket ug makamulta og P1,000 o ba kaha mopaubos sa community service.
Mahimo usab nga violator ang dili motuman sa 50 porsyento nga kapasidad sa mga pagtapok-tapok.
Ang kagamhanan miumol na og Anti-Covid Barangay Enforcement Unit nga maoy gitahasan pagpanakop sa mga violator.
Niadtong Marso 4, moabot sa 335 ka mga indibidwal ang naisyuhan og citation ticket.
Usa ka kawani sa Barangay Mayor’s Office (BMO) nalakip niini gumikan kay wala usab magsul-ob og tarong sa face mask samtang nanakop.
“Sugod sa city hall, sugod sa barangay, even police personnel, health personnel not wearing proper face mask, moisyu ta og citation,” matod ni Chan. (GCM)