SUPERBALITA CEBU

Pusher mahalinan og 40 kilo?

BIGTIME: Si Carlo Magno Tude, 36, gipresentar ni Cebu City Police Chief Colonel Josefi no Ligan human kini makuhai og kapin sa usa ka kilo sa gituohang shabu sa buy-bust sa kapulisan sa Barangay Ermita, Dakbayan sa Sugbo sa Sabado sa kaadlawon, Marso 6, 2020. Giingon nga makabaligya siya og 10 ka kilo matag semana. (Benjie Talisic)

KAPIN sa usa ka kilo nga shabu nasakmit sa mga operatiba sa City Drug Enforcement Unit (CDEU) sa Cebu City Police Office (CCPO) pasado alas 12 sa Sabado sa kaadlawon, Marso 6, 2021 sa dan Magallanes, Barangay Ermita, Siyudad sa Sugbo.

Si Police Major Jonathan Taneo, pangu sa CIty Drug Enforcement Unit (CDEU) niila sa nadakpan nga si Carlo Magno Tude, 36, nagpuyo sa nahisgutang dapit.

Nasakmit gikan kang Tude ang 1,050 gramos sa shabu nga mobalor og P7.1 milyones base sa Dangerous Drugs Board (DDB) value.

Ang shabu gisulod sa usa ka pack bag nga sama sa nasakmit sa nangaging mga buy-bust diin dinagko ang gipamaligya.

Matod ni Taneo nga usa ka informant nipadala kanila og mensahe pinaagi sa Facebook Messenger kalabot sa ilegal nga negusyo ni Tude.

Human sa tulo ka semana nga pagpaniid, ila dayon gi-buy bust si Tude pinaagi sa pagpalit og 50 gramos balor og P340,000.

Sumala sa ilang pagpaniid nga tag 10 ka kilo ang mahalin ni Tude matag semana kun 40 ka kilo matag buwan.

Di kini tigbaligya og ginagmay nga drugas.

Si Police Colonel Josefino Ligan, pangu sa Cebu City Police Office (CCPO) sa interview sa Superbalita Cebu, niingon nga ang shabu gikan kang Tude maoy labing unang usa ka kilo nga drugas nga nasakmit sa 2021.

Matod ni Ligan nga nahibawo na ang publiko nga bisan sa coronavirus pandemic, way puas ang kapulisan sa anti-drug operation.

Nagtuo si Ligan nga ang shabu nga nasakmit gikan kang Tude daan nga stock base sa iyang nakita nga paagi sa pagputos.

TAGA CITY JAIL



Nasayran gikan kang Tude nga ang supplier niya mao si Allen Ramas Badajos, alyas Balu, kinsa anaa sa sulod sa Cebu City Jail ug maoy mo-contact kaniya.

Si Badajos nadakpan sa usa ka buy-bust niadtong 2016 sa Carbon Police Station sa CCPO.

Matod ni Tude nga dunay tawo nga mohatod kaniya ug siya na ang bahala sa pagbaligya.

Samtang si Ermita Barangay Captain Mark Miral nibutyag nga residente nila si Tude, apan wa naapil sa listahan sa ilang Barangay Drug Abuse Council (BADAC) tungod kay karon pa nasayran.

Nasayran ni Miral nga si Tude usa ka courier sa online delivery services, apan mang-deliver usab diay og shabu.

Si Tude, sa iyang bahin, niingon nga binlanan lang siya og shabu ni Badajos.

Tawgan lang siya kon dunay gustong magpahatod bugti sa tag P5,000 kada transaction.

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph