Kaso sa Covid-19 sa Cagayan de Oro anaa na sa 3,866

PADAYON ang pag-ubos sa ihap sa mga bag-ong kaso sa coronavirus disease (Covid-19) sa Cagayan de Oro human unom ra ka mga residente ang mipositibo sa Sars-CoV-2.

Ang kinatibuk-ang ihap sa mga kumpirmadong kaso sa dakbayan anaa na sa 3,866.

Matud sa City Health Office, sa unom ka mga bag-ong mga kaso, usa ang authorized person outside residence (Apor) ug lima ang mga local index nga mga kaso.

Sa 3,866 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,444 ang mga local transmissions.

Aduna nay 150 ka mga aktibong kaso ang Cagayan de Oro diin 57 niini na-admit sa Northern Mindanao Medical Center ug uban pang mga ospital sa syudad ug 93 ang mga outpatients.

Gawas niini, aduna sab natala nga 12 ka mga pasyente nga naka-rekober na. Sa karon, anaa na sa 3,532 ang ihap sa mga nakarekober nga mga kaso sa dakbayan.

Sa maong numero, 302 ang mga LSIs, 119 ang mga ROFs, ug 3,111 ang mga lokal nga kaso. Anaa na sa 91.33 percent ang recovery rate sa Cagayan de Oro.

Niabot sa 184 ang ihap sa mga namatay sa Covid-19 sa syudad.