SUPERBALITA DAVAO

Genoguin: Nasina si Isko Moreno?

Kontra Balanse

PITO ka bulan na lang ang atong paabuton tingpayel na sa ilang certificate of candidacy ang mga politiko nga gustong managan sa lokal ug nasyonal nga posisyon ug katorse ka bulan eleksiyon na sa Mayo 2022.

Dili ta magpukos sa lokal tungod kay sayod na kitang tanan way mokontra sa mga Duterte sa bisa'g unsang political position dinhi sa atong Dakbayan sa Davao nga kon ugaling mahinayon si Mayor Sara Duterte-Carpio sa taas nga posisyon, segurado nga si Vice Mayor Sebastian "Baste" Duterte ang atong mayor sa siyudad.

Atong sundan ang political career ni Duterte-Carpio, 9 anyos pa ang iyang edad sa dihang nahimong mayor ang iyang amahan sa atong dakbayan niadtong Enero 18, 1988, unang lokal eleksiyon human sa Edsa People's power.

Migraduwar sa abogasiya niadtong 2005 sa edad nga 27 anyos ug mipasar sa pasulit sa 2006. Pagkasunod tuig, 2007 sa lokal nga eleksiyon, misalga gilayon sa politika ug gi-tandem sa iyang amahan sa pagka-vice mayor, ug kay last term man sa iyang amahan nianang lokal ug nasyonal eleksiyon sa 2010, gipadagan sa amahan sa pagka-mayor atbang sa dili basta-bastang politiko ug mortal nga kaaway sa mga Duterte nga si kanhi House Speaker Prospero "Boy" Nograles nga gipildi ni Mayor Sara.

Karong 2022, tangkod nga siyam ka tuig, tulo ka termino ni Duterte-Carpio sa pagka-mayor sa atong dakbayan, nasanay siya sa executive position ug nahimong tunog karong panahona nga modagan sa pagka-presidente. Daghan ang nagboluntaryo nga migasto sa pagpahimo og mga tarpaulin nga gipakatag sa Mindanao, Visayas ug Luzon.

Dinhi NASINA SI ISKO MORENO, kay zero mismo sa Manila City. Ni-isa walay nagboluntaryo nga nagpahimo og mga tarpaulin aron awhagon siya nga modagan sa pagka-presidente.

Sa pagkakaron, upat ka personalidad ang gituhoan nga modagan sa pagka-presidente.

Una si Vice President Leni Robredo, Manila Mayor Moreno ug si Bongbong Marcos. Si Bongbong malabo, kay kon wala modaug sa pagka-bise presidente, sa pagka-presidente pa ba kaha? Dapat wa nay Marcos ug mga Aquino nga modagan sa taas nga posisyon kay puol na. Unsa man, wa na gyuy lain?

Kon duna may bright nga Marcos mao ang amahan ug kon aduna may bright nga Aquino, mao ang amahan usab? Ambot sa inyo.

Kang VM Robredo wala siya'y kalainan kang Cory Aquino. Gigamit sa mga dilawan kay gipatay man ang iyang bana sa Manila International Airport, gipadagan pagka-presidente. Si Robredo kay namatay ang bana sa disgrasiya, gipadagan sa pagka-congresswoman sa laktud, SYMPHATHY VOTES.

Si Moreno, dunay kasinatian gikan sa pagka-konsehal, vice mayor hangtud nahimong mayor, kaya lang, iyang i-esplikar pag-ayo kon unsay iyang sekretong kalambigitan sa KOMUNISTA kay sa matag meeting sa mga galamay ni Jose Maria Sison sa Oslo, Norway istaring man kaayo siya? Basi'g siyay sekretong kandidato sa Communist Party of the Philippines (CPP)-New People's Army (NPA)-National Democratic Front (NDF).

Kang Mayor Duterte-Carpio plansado, walay isyu. Sa kasinatian, puro executive position ang gikuptan. Problema lang kay kon kinsa to ang gusto sa mga tawo, mao man hinuoy dili modagan. Pero daghan pang kausaban. Dili pa modagan si Mayor Sara kay wa pa may eleksiyon. Hulaton nato ang tukmang panahon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph