NAGLATAGAW ug padayong gipangita sa kapulisan ang suspek nga giingong nagpatay sa 6-anyos sa Toril, Davao City.
Sumala sa kapulisan sa Toril PNP sa pagpanguna ni Police Major Michael Uyanguren, hepe sa maong istasyon, nga naa na silay gipanubayan ug posibleng maoy suspek.
Gikataho sab sa social media nga nawad-an sa maayong pangisip ang midunggab-patay sa 6-anyos, apan wala una mikomento si Major Uyanguren niini.
Kahinumdoman nga napalgang patay sa kilid sa sapa alas 6:45 sa gabii niadtong Huwebes, Marso 4, 2021, didto sa Batulosa, Bangkas Heights, Toril, Davao City ang biktimang si Kenjay Jainar Gido.
Nananghid ang biktima sa iyang inahan nga maligo sa ulan, apan wa na kini makauli hinungdan nga nabalaka ang inahan ug ila na kining gipangita. Bisan mga silingan nabalaka sab busa mitabang sila sa pagpangita sa biktima.
Alas 6:40 sa gabii, napalgang patay ang biktima kilid sa sapa nga dunay mga samad sa ulo ug dunay daghang dinunggaban sa kalawasan. (Jeepy P. Compio)