NALANTAWAN nga magkabuwag ang dalan ni Bobby Parks Jr. ug sa Talk N’ Text (TNT) Tropang Giga.
Nagsugod ang tanan dihang gipadayag ni Parks nga dili una siya moduwa sa sunod nga season sa Philippine Basketball Association (PBA) gumikan sa personal nga rason.
“It is with a heavy heart that I will have to excuse myself and not partake in this year’s PBA season due to personal reasons which in particular, my family,” pamahayag pa ni Parks.
Sa wala pa mianunsyo si Parks kabahin sa iyang intensyon, aduna na’y bomba nga paingon nang moulbo kabahin sa relasyon ni Parks ug Tropang Giga.
Sa miaging pipila ka mga semana, ang TNT nakignegusasyon kang Parks alang sa bag-ong kontrata ug nagtuo ang TNT nga nakigsabot sila sa usa ka magduduwa nga naa pa sa gawas sa nasod.
Apan adunay nakuhang hulagway ang kampo sa TNT ni Parks nga adunay petsa nga Pebrero 25, 2021 ug ilang nasayran nga naa ra diay kini sa Pilipinas partikyular sa La Union atol sa ilang pagpakignegusasyon.
Mismong ang tag-iya sa TNT nga si Manny V. Pangilinan nag-post sa social media og usa ka nga tanghaga nga mensahe nga naghatod og mas daghang pangutana kaysa sa tubag.
“I don’t see any mother being cared for, and as far as I know, La Union is nowhere near California. Judge for yourself,” mensahe ni Pangilinan.
Usa ka kasaligang tinubdan ang nagkanayon nga nasuko og maayo si Pangilinan sa gibuhat ni Parks.
“Galit na galit,” matod sa tinubdan. “Well, kahit na sabihin n’yang andito s’ya ng Feb. 25 tapos bumalik na sa States, eh wala man lang s’yang nabanggit na umuwi s’ya.”
Ang usa ka tuig nga kontrata ni Parks sa TNT ni-expire na human sa Philippine Cup bubble.
Giangkon sa nibalik nga coach sa TNT nga si Chot Reyes nga usa ka dakong haw-ang ang mabuslot sa ilang puwersa kon wala si Parks. Nanghinaot si Reyes nga maresolbar ra ang problema.
“First of all, we wish nothing but the best for Ray and that he finds resolution to his personal problems,” batbat ni Reyes. “Obviously, losing him will be a big blow to TNT as he was an integral part of our plans moving forward.”
Hinuon giklaro ni Reyes nga kon hingpit nga mawagtang si Parks sa ilang puwersa, makasugakod ra sila.
“This is a big setback for us. But I have faith in the players in our team. We will find a way,” asoy ni Reyes. (ESL)