Montero Taxi pormal nga gilusad sa GECTC

BLESSING: Gibendisyonan sa pari ang 20 ka units sa Premium Gold Montero 2021 model nga bag-ong mga taxi nga magdagan unya sa kadalanan sa Sugbo. Kini atol sa paglusad sa Golden Eagle Cebu Transport Cooperative (GECTC) niadtong Pebrero 28, 2021. Nitambong sa kalihokan ang mga opisyal ug miyembro sa GECTC uban sa mga opisyal sa Land Transportation Franchising and Regulatory Board sa Central Visayas, Office of the Transport Cooperative ug Cooperative Development Authority. / Tampo
BLESSING: Gibendisyonan sa pari ang 20 ka units sa Premium Gold Montero 2021 model nga bag-ong mga taxi nga magdagan unya sa kadalanan sa Sugbo. Kini atol sa paglusad sa Golden Eagle Cebu Transport Cooperative (GECTC) niadtong Pebrero 28, 2021. Nitambong sa kalihokan ang mga opisyal ug miyembro sa GECTC uban sa mga opisyal sa Land Transportation Franchising and Regulatory Board sa Central Visayas, Office of the Transport Cooperative ug Cooperative Development Authority. / Tampo

GIHANGOP ug gipahalipayan ni Land Transportation Franchising and Regulatory Board (LTFRB) 7 Director Eduardo Montealto Jr. ang kinatibuk-ang puwersa sa Golden Eagle Cebu Transport Cooperative (GECTC) tungod sa kooperasyon nga gihimo niini ngadto sa ilang buhatan aron makab-ot ang maayong katuyoan nga makaserbisyo sa publiko.

Si Montealto maoy pinasidunggang dinapit atol sa paglusad sa launching sa GECTC sa ilang 20 ka units nga Premium Gold Montero 2021 model Taxi niadtong Pebrero 28, 2021.

Ang launching nga giayudahan usab sa LTFRB ug sa buhatan sa Mitsubishi Philippines - Cebu gipahigayon sa buhatan sa Mitsubishi sa Barangay Mambaling, dakbayan sa Sugbo.

Gikalipay ni Montealto ang tanang pagsanong sa GECTC sa requirements nga gikinahanglan aron hingpit kini nga maka-operate alang sa publiko.

“Magtinabangay ta. Tabangi mi ninyo, kay tabangan sab tamo,” matod ni Montealto.

Iya usab hugot nga gipanghimangnoan ang mga opisyales ug miyembro sa GECTC nga kinahanglan makigtambayayong usab kini sa pagpakgang sa corruption ilabi na sa iyang ahensiya.

Ang GECTC maoy transport cooperative nga milusad og premium gold taxi nga maka-operate na unya sa dakbayan sa Sugbo ug sa Cebu Province.

Ang chairman of the board nga si Agustin “Rolly” Isugan misaysay nga dili sayon ang ilang naagian aron makuha ang tanang mga rekisitos nga gikinahanglan. Apan alang kaniya dili kini mahimong babag sa ilang determinasyon aron makab-ot ang katumanan.

Siya mapasalamaton sa tanang miitsa sa ilang hugot nga suporta aron mahimugso ang GECTC.

“It’s not easy to accomplish all the requirements but in God’s grace and blessings and with the guidance of the Holy Spirit, everything is possible,” matod ni Isugan.

“Few years from now, we can expand our services not only in the Visayas, but in the entire Philippines,” dugang niya.

Atol usab sa kalihukan, gipahigayon ang test drive sa 20 ka units nga gipanalanginan.

Gawas sa kaanindot ug kahamugaway sa mga unit, garantisado usab unya ang maayong serbisyo sa mga driver ngadto sa mga pasahero.

Si Mary Caroline Boter, vice-chairman sa board of directors (BOD) nga mao usab ang usa sa mga lig-ong haligi sa maong kooperatiba, nagkanayon nga aduna silay ipahigayon nga mga seminar ngadto sa drivers.

“Mag-schedule ta og seminars sa atong drivers. Naa tay mga code of ethics nga ipasunod. Tudloan nato ang mga driver unsaon pag-establish og rapport ngadto sa mga pasahero,” matod ni Boter.

Gipaabot nga sulod ning buwana aduna nay mga GECTC Premium Montero Taxi ang pormal na nga magdagan sa mga kadalanan sa Sugbo.

Gawas ni Montealto, nitambong usab sa launching si Analyn Conocono, training specialist sa Office of Transport Cooperative, Cletus Villamor sa Cooperative Development Authority (CDA).

Ang duha mipadungog usab sa ilang mga mensahe ngadto sa mga sakop sa GECTC. (PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph