SECTIONS
Superbalita Cebu
Saturday, December 04, 2021
SUPERBALITA CEBU

Nadela: Ting-init sa tinggutom

Pedal

TANANG paagi sa pagdaginot nasulayan na nato sukad nagsugod pagpanghasi ang coronavirus sa miaging tuig. Apil na gani ang pagdaginot sa tubig. Nahinumdum mo sa kanihit sa tubig sa miaging tuig? Way kabutangan ang reklamo sa mga tawo tungod sa kahinay sa pressure. Pagdaginot sa tubig ang panawagan sa Metropolitan Cebu Water District (MCWD) tungod kay nibahar ang ilang mga tinubdan niadtong panahona.

Sa ato pa pandemic ug kanihit sa supply sa tubig ang atong nasinati sa pagsugod sa kalbaryo sa Covid-19. Karon nahadlok ko nga susamang sitwasyon ang atong mahiaguman kon magpadayon ang kainit sa panahon. Mao nga angayng magsugod na ta pagpangita og dugang kapundohan pagsiguro nga dili kita mahubsan. Apan ang sakit sa tanan kon ang sudlanan sa bugas maoy mohubas. Mao nga subli tang mangutana sa gobiyerno, may mapaabot pa bang ayuda?

O, kutob nalang ta sa pag-ingon nga gitangtang naman ang mga gidili gawas sa face mask, face shield ug pagpanghunaw, paningkamot nalang mo og inyo nga mabuhi. Wala nako mahisgoti ang social distancing kay sa pagka tinuod akong naobserbahan nga wala na gyud ni masunod karon. Ilabi na diha sa mga merkado. Kon wala nay ayuda, aw unsaon ta man. Apan kini maoy labing tinuod.

Molanat pa gani ning virus panahon sa kampanya, sigurado ko nga mobalik na sab ang nilistahay alang sa mga hataganan sa ayuda. Nagsugod naman gani ang mga pahibalo alang sa minilyon ka pisos nga ayuda alang sa mga barangay. Kon mao ni nahitabo diha sa inyo, nindot paminawon. Apan sa mga nagkutoy ang tiyan, daw dili makiangayon. Wala pa gani ka-liquidate ang mga barangay sa mga ayuda kaniadto, dia na say minilyon nga paaboton. Kon para proyekto, way problema. Pero kon ang tuyo alang sa 2022 nga eleksiyon, klaro kaayong pamolitika.

* * *

Fire prevention month ang bulan sa Marso nga padayon natong gisaulog. May mga alarma na nga girespondihan ang atong kabomberohan. Usa sab ni sa rason nganong gidasig nato ang publiko sa pagpundo og tubig, kay simbako mokalit og silaob ang atong abuhan o bisan asa da atong balay may magamit ta nga pang-alkontra. Manghinaot ta nga ang pinakakaraang fire brigade nga giila sa pangalan nga bayanihan spirit, pabiling buhi diha sa inyong mga sityo. Kon patay na, atong buhion. Kon wala pa, atong ugmaron.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!