MISAAD ang China og kapin sa tunga sa bilyon nga doses sa bakuna batok sa Covid-19 ngadto sa kapin sa 45 ka mga nasod, sumala pa sa taho sa Associated Press. Ang ubang bakuna gidonar, samtang ang uban gipangbaligya.
Ang Pilipinas usa sa nakadawat sa donasyon sa mga bakuna gikan sa China. Mokabat sa 600,000 ka mga doses sa CoronaVac nga ginama sa Sinovac sa China, niabot sa kaulohan niadtong Dominggo, Pebrero 28.
Kita ang labing unang nasod sa Southeast Asia nga nakadawat sa bakuna batok sa Covid-19 gikan sa China. Kabahin niini gipadala sa mga siyudad sa Sugbo ug Davao. Gisugdan na ang pagbakuna sa Vicente Sotto Memorial Medical Center sa siyudad sa Sugbo.
* * *
Tungod sa dakong kapasidad sa mga tiggama og bakuna sa China, hayan ang mga bakuna gikan sa China maoy mokatap sa tibuok kalibotan. Kadaghanan sa katawhan mabakunahan sa bakuna nga ginama sa China.
Ang mga bakuna gikan sa Estados Unidos, United Kingdom ug Uropa gitukob sa mga dato nga nasod. Sumala pa sa Duke University sa sa Estados Unidos, ang mas adunahan nga mga nasod mipalit sa 5.8 ka bilyon sa 8.2 ka bilyon ka doses sa tibuok kalibotan.
Sa Pilipinas, di pulos bakuna gikan sa China ang gamiton. Kay niabot man niadtong Huwebes sa gabii, Marso 4, ang mokabat sa 500,000 ka doses sa bakuna gikan sa AstraZeneca. Dugang sa bakuna gikan sa China, moabot sa tunga sa milyon ka mga Pilipino ang mabakunahan.
* * *
Pero unsa man kining gitawag nga vaccine diplomacy sa China? Sa atong nakita, pahumot ni sa imahe sa China ngadto sa ubang mga nasod nga nagkalisod ang ekonomiya tungod sa Covid-19 kay didto baya magsugod ang maong balatian sa ila.
Apan gihimakak sa China ang giingong vaccine diplomacy. Usa ka tigpamaba sa Ministry of Foreign Affairs sa China niingon nga giila sa China ang bakuna batok sa Covid-19 nga usa ka 'global public good.'
May bugti ba kini? Si Pres. Rodrigo Duterte atol sa news conference niadtong Dominggo, Pebrero 28, niingon nga way gipangayo ang China.