SUPERBALITA CEBU

2 wa maka-graduate sa drug training, positibo sa drugas

GRADUWASYON: Ang gradu­ation ceremony sa pito ka drug warriors training sa Barangay Anti-Drug Abuse Council (Badac) sa Barangay Ibabao-Estancia, Mandaue City niadtong Sabado, Marso 6. / Kate F. Denolang

GAWAS sa siyam nga graduating drug warriors sa Barangay Anti-Drug Abuse Council (Badac) community-based rehabilitation program sa Barangay Ibabao-Estancia, Mandaue City, pito na lang ang mi-graduate human ang duha nagpositibo sa drug test niadtong Sabado, Marso 6, 2021 sa gabii.

Ang drug warrior mao kini ang tawag sa drug surrenderers sa dakbayan sa Mandaue.

Matod ni Romulo Echavez Jr., kapitan sa Barangay Ibabao Estancia, nga sa wala pa magsugod ang graduation sa drug warriors, nagpahigayon sila og surprise drug test.

Kini isip katapusang pagsusi kon angayan na ba nga mo-graduate ang maong drug warriors, apan wala magdahom nga adunay duha nga nagpositibo sa drug test.

Sigon ni Echavez nga ang duha wala makapaso kuyog sa pito niadtong adlawa.

Matod niya, mao kini ang unang batch sa drug warriors nga nigradwar sa ilang barangay sa iyang termino isip kapitan.

Sigon ni Echavez nga ang unang batch aduna kini 15 kabuok nga drug warriors.

Ang usa niini niundang dayon sa wala pa magsugod ang rehabilitation program, ang tulo niini nagpositibo sa surprise drug test nila apan dili grabe ang paggamit sa ginadiling druga, samtang ang duha nagpositibo sab sa surprise drug test apan dili na matabang sa Badac ug kinahanglan na og tabang gikan sa City Anti-Drug Abuse Council (Cadac).

Gidugang ni Echavez nga ang tulo nga dili grabe ang paggamit, gihatagan kini og tsansa nga makaapas sa ilang batch ug gani, gilaraw nga mogradwar sab sila sa Abril.

Sigon ni Echavez nga aron makagradwar sila sa ilang community-based rehab program kinahanglan nga ang mga drug warrior makakompleto sa ilang seminar sulod sa upat ka buwan.

Kinahanglan sab sila mopaubos sa surprise drug test matag duha ka semana.

Ug usa sab nga kinahanglan nila nga kompletohon ang ilang 100 hours nga community service diin motrabaho sila isip barangay tanod o sa clean and green.

Human sa graduation, sigon ni Echavez nga ipaubos pa gihapon og after care ang drug warriors aron ma-monitor nga dili na sila mobalik pa sa ilang bisyo.

Lakip sa maong after care ang pagpaubos nila sa surprise drug test matag semana.

Gani, gihatagan sab sila og livelihood program pinaagi sa Technical Education and Skills Development Authority.

Gawas sa mao nga batch, aduna pay 165 ka drug surrenderers nga kinahanglan pa mopaubos sa rehab program, apan, matod ni Echavez, i-validate pa nila kini. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph