PALAWMAN pa sa Cebu City Police Office (CCPO) ang imbestigasyon labot sa tinubdan sa kapin usa kilong shabu nga nasakmit gikan sa usa ka delivery driver sa dalan Magallanes, Barangay Ermita sa siyudad sa Sugbo niadtong Sabado sa kaadlawon, Marso 6, nga si Carlo Magno Tude, 36, molupyo usab sa maong lugar.
Si Tude nakuhaan og mga binulto sa gituohang shabu nga mobalor ang tanan sa P7.1 milyones nga giingong gipadala lang kaniya.
Matod ni Police Lieutenant Colonel Wilbert Parilla, deputy city director for operations sa CCPO, makig-alayon sila sa Bureau of Jail Management and Penology sa dihang mitug-an ang dinakpan nga gikan sa usa ka binilanggo ang supply.
Nailhan ang maong binilanggo sa Cebu City Jail nga si alyas Balo nga naila sa tinuod nga pangalan nga si Alen Ramas Badajos nga nadakpan gihapon sa kaso sa illegal nga drugas niadtong 2016.
Giklaro hinuon ni Parilla nga ang supply sa shabu wala kini maggikan sa sulod sa bilanggoan apan ang nagpadagan mao si Badajos.
Wala pa masayri kon asa kini gikan nga personalidad sa gawas ang supply nga mao karon ang girumbo sa imbestigasyon sa City Drug Enforcement Unit sa CCPO.
“Usually moingon sila nga naa sa sulod sa BJMP ang source but it’s not, only ang tawo nga nagsugo or ang transaction. Pero ang item wala diha sa sulod naa ra sa gawas, kanang mga dagko nga personality nga naa sa jail sila man nay naay mga connections kung kinsa tong mga drug personalities nga naa sa gawas,” matod ni Parilla.
Mikooperar na si Tude sa gihimong imbestigasyon ug ang resulta niini maoy sunod nga target sa anti-drug operation sa mosunod nga mga adlaw.
Makig-alayon usab ang CCPO sa Cebu City Jail aron mahunong na ang padayon nga komunikasyon pinaagi sa cellular phones sa mga binilanggo ngadto sa ilang mga contact sa gawas.
Dugay na kini nga problema, matod ni Parilla, nga angayan nga hatagan og solusyon sa labing dali nga panahon.
Lakip sa ilang gipang- monitor karon sa kapulisan ang mga bag-ong laya nga nadakpan kaniadto sa illegal nga drugas.
Kasagaran sa mga madakpan ug kon makagawas na, modako na hinuon siya sanglit daghan na kinig nakaila nga mga bigtime drug pusher sa sulod.
Sila na usab ang mamahimong contact aron maoy mopadagan sa illegal nga negosyo niadtong mga piniriso nga naay connection sa mga bigtime nga naa sa New Bilibid Prison. (AYB)