SUPERBALITA CEBU

14-anyos luwas, bugaw nadakpan

GIPRISO: Si Vanessa Manuit alyas Darlyn, 23, ug molupyo sa Sityo Sumayo sa Lorega San Miguel, dakbayan sa Sugbo ang suspek nga bugaw nga nabalhog sa prisuhan sa Parian Police Station. (Benjie B. Talisic)

USA ka 14 anyos nga batang babaye ang naluwas gikan sa usa ka 30 anyos kapin nga lalake nga gihulagway sa kapulisan nga usa ka drug lord sa Barangay Carreta, siyudad sa Sugbo.

Si Police Major Albert Quilotorio, hepe sa Parian Police Station nga nahinabi sa Superbalita Cebu, niingon nga ang pagluwas sa biktima gihimo sa ala 1:00 sa kaadlawon niadtong Sabado, Marso 6.

Matod ni Quilotorio, kuyog ang mga tanod sa Barangay Lorega San Miguel ug ang ginikanan sa biktima, ilang giadto ang panimay sa suspek nga giingong nagbugaw sa 14 anyos ngadto sa usa ka “Michael” kinsa giingong dakong tigpayuhot og gidiling drugas sa barangay.

Nasayran nga ang biktima nga si Lenny (tinuod ngan gipugngan) ug lumad nga taga Negros Oriental, nidangop sa Parian Police Station.

Ang mga ginikanan ni Lenny nangayo og tabang sa kapulisan aron pagkuha sa 14 anyos nga babaye nga gibugaw ug gidala sa suspek nga si Michael didto sa usa ka hotel.

Saysay pa sa biktima ngadto na sa Women and Children’s Protection Desk nga usa ka Vanessa Manuit alyas Darlyn, 23, ug molupyo sa Sityo Sumayo sa Lorega San Miguel, ang nagbugaw kaniya.

Matod pa, kaila si Manuit sa mga ginikanan ni Lenny ug wala sila magtuo nga mabuhat niini nga ibaligya ang dungog sa ilang anak.

Sumala sa inahan, ang iyang anak wala mahibawo sa transaksyon ni Manuit ug Michael. Wala magdugay gidala og pugos sa duha ang iyang anak sa usa ka hotel sa dalan Sanciangko sakay sa taxi.

Ang biktima misaysay nga nagmalampuson ang suspek human nga gibiyaan sila ni Manuit bisan paman nga nagdumili kini sa kagustohan ni Michael.

Ang mga pulis sa Parian kuyog ang mga ginikanan sa biktima ug barangay tanod sa Barangay Lorega San Miguel nisikop kang Manuit.

Ang dinakpan mag-atubang og kasong kalapasan sa Republic Act 10364 o kalapasan sa Human Trafficking Act. Samtang, ang giingong drug lord nga suspek nga si Michael nakasibat na.

Si Manuit sa iyang pamahayag, nidepensa sa iyang kaugalingon nga matod pa mismo ang biktima maoy mihangyo kaniya nga dad-on siya ngadto na kang Michael tungod kay dunay tuyo niini.

Ang suspek tungod kay duna pud tuyo kang Michael tungod mokuha og drugas, hinungdan nga iya kining gikuyogan.

Pangangkon pa sa dinakpan nga sa iyang pagtuo nga uyab na daan si Michael ug Lenny tungod magsige man sila og kita nabugnaw matod pa ang pagtagad ni Michael ngadto kang Lenny.

Kini human nga wala mabayri sa amahan sa biktima ang usa ka bulto nga shabu nga gikuha niini gikan kang Michael.

Hinungdan nga si Lenny ang miadto kaniya tungod kay nagtuo ang menor de edad nga nangluod si Michael kaniya tungod sa gibuhat sa iyang amahan.

Ang suspek nga si Manuit tungod dunay kini utang si Lenny kaniya, iya usab plano nga si Michael ang paninglan.

Gidugang ni Manuit nga ang usa ka libo nga gihatag ni Michael kaniya mao kadto ang bayad sa utang ni Lenny ug dili bayad sa iyang pagpamugaw kay wala niini gibugaw ang biktima.

Sa kasamtangan, si Manuit gibalhog sa Parian Police gipriso. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph