CCPO moabag sa kabomberohan sa dakbayan sa kampanya sa Fire Prevention Month 2021

DILI lang trabaho sa kabomberohan ang pagpahimangno sa publiko labot kon unsaon sa paglikay sa sunog ning panahon sa Fire Prevention Month, apan nakauhan natong tanan.

Miduyog usab karon ang kapulisan sa siyudad sa Sugbo pinaagi sa pagpakighinabi sa mga molupyo sa kabarangayan nga mag-amping nga malikayan ang sunog sa panimalay.

Matod ni Police Lieutenant Colonel Wilbert Parilla, deputy city director for operation sa Cebu City Police Office (CCPO), nga nakig-alayon sila sa Bureau of Fire Protection (BFP) aron matabangan sila sa pag-edukar ang publiko pinaagi sa himuon nila nga recorida sa kabarangayan.

Manghatag silag pahibalo unsaon nga malikay sa sunog ning panahon sa kwarisma nga moinit usab ang palibot.

Ilakip usab sa ilang topic ang tips sa paglikay sa sunog atol na unya sa matag buwan nga dialogue sa kabarangayan.

Nganong manginlabot niini ang kapulisan, matod ni Parilla, nga ang unang tawgon sa mga tawo kon adunay motumaw nga sunog mao man ang police stations.

“Concern man gud ni sa tanan ang sunog dili lang sa BFP. So, kita sa kapulisan apil ta nga mopahimangno sa publiko nga mag-amping sa atong mga balay labi na sa paggamit sa ilang appliances aron dili masunog,” matod ni Parilla.

Ang buwan sa Marso maoy labing gibantayan sa mga bombero tungod kay masinati na usab ang kainit sa panahon ug mosaka usab ang kaso sa sunog sa maong panahon.

Tungod niini, awhag sa kapulisan sa publiko nga likayan nga biyaan ang ilang panimay nga nakasaksak pa ang appliances lakip na cellular phones nga kuyaw nga mobuto nga momugna na hinuon og sunog. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph