USA ka babaye nga nailang talent sa usa ka lokal nga programa sa telebisyon sa Sugbo ang nilayat sa bintana gikan sa usa ka lawak sa ikatulong andana sa Queensland Motel sa dalan C. Padilla, Barangay Mambaling, dakbayan sa Sugbo niadtong Sabado sa alas 7:37 sa gabii, Marso 6.
Atol ning pagsuwat, ang babaye (ngan gipugngan ning mantalaan) padayong giobserbahan ang kahimtang sulod sa Cebu City Medical Center human nakaangkon og mga bali ug samad sa iyang lawas.
Si Police Corporal Mark Anthony Dela Victoria sa Mambaling Police Station niingon nga nadawat sa mga pulis ang kasayuran sa hitabo alas 9 na sa gabii ug ang babaye nadala na sa ospital.
Matod ni Dela Victoria, ang babaye nagpangidaron og 28 ug molupyo sa Barangay Kalunasan, dakbayan sa Sugbo.
Sa nakuha nga kasayuran ni Dela Victoria, nasayran nga ang babaye dunay kuyog nga lalake sa pag-check-in sa motel.
Sa record sa motel, nisulod ang duha sa alas 7:28 sa gabii ug damtan lang og pipila ka minutos, nahitabo na ang paglayat sa babaye gikan sa 3rd floor sa motel.
Usa sa mga room boy nga naka-duty niadtong panahona nga nahinabi sa Superbalita Cebu, niasoy nga pag-abot sa duha sakay sa taxi, iyang nabantayan nga pulos nakainom.
Ang babaye, matod pa, nangutana sa lalake kon asa sila dapita, apan tungod sa kahubog, ang wala na kini tubaga sa lalake.
Samtang, ang lalake nitubag kaniya nga miingon nga pasagdahan lang ang iyang kauban tungod hubog na, dayon sulod nila aron mokuha og kwarto.
Sa room 605 sa maong motel, ni-check-in ang duha sa ikaunom nga andana sa motel.
Wala damti og oras, ang manager sa motel nangita og room boy kay diay ang maong babaye nisulod sa iyang kwarto.
Si Jaymar Balladares, manager sa Queensland Motel, niingon nga ang biktima nisulod pa gani sa iyang kwarto hinungdan nga iyang gipangutana kon asa kini nga kwarto naka-check-in.
Ug tuod man, gitawag ang room boy aron unta mahatod sa iyang lawak apan milahos kini sa pagsakay sa elevator ug minaug didto na sa third floor.
Nagtuo ang mga trabahante sa maong motel nga ang biktima sa iya siguro pagtuo anaa na kini sa ground floor, rason nga milayat kini paingon sa ubos.
Ang pulis sa Mambaling Police Station wala pa mahibawo sa tinuoray nga estorya sanglit ang biktima anaa pa man sa talandugon nga kahimtang human na-trauma nunot na sa nahitabong pag-ambak sa edipisyo.
Gani, wa pa makuha sa kapulisan ang pangan sa kauban niini tungod kay mismo ang babaye di pa makatarong og sulti ug kasamtangan gipapahuway.