SUPERBALITA CEBU

542 nasikop sa Lapu-Lapu paglapas sa mga health protocol, curfew

Mayor Junard “Ahong” Chan (File photo)

Pinaagi sa pagpahugot sa kampanya sa pagsilot sa mga tawo nga wa motuman sa mga health protocol ug curfew, ang Dakbayan sa Lapu-Lapu nakasikop og 542 ka mga tawo gikan sa Huwebes, Marso 4 ngadto sa Marso 5, 2021.

Ang Siyudad nagpahamtang og silot sa mga madakpan og P1,000 nga multa ug kon di makabayad, pahimuon og community service human maisyuhan og citation ticket.

Niadtong Sabado, Marso 6, 2021, ang wa makabayad, gipalimpyo sila sa mga drainage ug basura sa Barangay Basak.

Mao kini ang gibutyag ni Mayor Junard “Ahong” Chan sa Dominggo, Marso 7, 2021 dungan sa pagpahibawo nga ang masikop di bilangguon, isyuhan lang og citation ticket.

Matod ni Chan nga ang madakpan sa paglapas sa mga health protocol ug curfew, kon di makabayad, mohatag og community service matag Sabado.

Sa samang higayon, iyang gibutyag ang top barangays sa Lapu-Lapu City nga dunay mga kaso sa coronavirus disease (Covid-19).

Ang 10 ka mga barangay nga dunay labing taas og mga kaso sa Covid sa Marso 6 naglangkob sa Basak (155); Pajo (75); Babag (70); Mactan (61); Bangkal (56); Gun-ob (52); Marigondon (31); Pusok (27); Looc (27); Pajac (25); ug Agus (24).

“Ang pinaka importante gyud kining atong face mask. Mao ni ang atong bugtong taming nga modaug sa ta niining Covid-19,” matod ni Chan sa iyang pagpahinumdom sa mga Oponganon sa kanunay nga pagsunod sa mga health protocol.

Matod niya nga nataptan siya og Covid human siya mokompyansa pinaagi sa pagtangtang sa iyang face mask human sa trabaho sa iyang buhatan.

Giawhag usab ni Chan ang mga Oponganon nga magpakabakuna kon moabot na ang vaccines gikan sa nasudnong kagamhanan kay siya mismo magpatusok.

Apan iyang giklaro nga di pugsanay ang pagpabakuna, apan sa samang higayon, nanghinaut nga way tawo nga mobalibad aron makalingkawas na ang katawhan sa Covid-19 nga mga usa ka tuig nang giantos. (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph