Roldan: 'Rev Gov' ipatuman?

GAWAS sa isyu sa Covid-19, nikusog sab ang balita kabahin sa gitawag nga "Revolutionary Government" o "Rev Gov."

Usa kini ka paagi sa pag-usab sa gobyerno pinaagi sa gahum sa militar nga gitawag og "junta" o susamang pundok nga maoy na unyay temporaryong modumala niini.

Dili kini bag-o kanato kay gihimo kini sa panahon sa Martial Law ni kanhi Presidente Ferdinand Marcos ug sa pagpuli ni kanhi Presidente Cory Aquino human sa 1986 Edsa revolution. Mao usab kini ang nahitabo karon sa Myanmar nga gitawag kanhi og Burma diin ang usa ka Heneral sa sundalo ang nagdumala. Ang tanang sibilyan nga opisyales anaa sa "house arrest" hangtud nga makab-ot sa mga sundalo ang ilang katuyoan sa ilang kudeta.

Ubos sa Rev Gov, mawala na ang lehislatora nga senado ug kongreso nga maoy tigpanday og mga balaod. Mahanaw sab ang local government units gikan sa probinsiya ngadto sa barangay kay pulihan sila sa gitawag nga mga "caretaker officers" o mga officer-in-charge (OIC) sama sa gibuhat ni PCory sa pagdeklara niya og Rev Gov ug pagpanday sa 1987 Constitution.

Si Presidente Rody Duterte mismo produkto sa Rev Gov ni PCory kay siya ang gipili nga OIC Vice Mayor sa Davao City, samtang si Atty. Zafiro Respicio ang OIC Mayor.

Daghan ang nag-ingon nga sayang ang Rev Gov ni PCory kaniadto kay mausab unta niini ang dunot nga sistema nga nakapaunlod sa Piipinas. Human sa pipila ka presidente ug hapit na mahuman ang termino ni PRody, nagdamgo gihapon ang katawhan og kabag-ohan ilabi na sa ekonomikanhong kahimtang ug ang pagkontrolar sa adunahan sa kinabuhi sa nasud.

Ang mga tigpasiugda sa Rev Gov nagsuti nga kulang kaayo ang unom ka tuig nga pagdumala ni PRody kay wa pa niya nakab-ot ang 50% sa iyang gihandom nga kabag-ohan sa Pilipinas.

Daghan daw'ng babag sa iyang gusto, usa na niini ang senado ug kongreso nga may kaugalingong mundo nga dili magkatugma sa iyang mga plano.

Usa sa buhaton sa Junta nga modumala unya mao ang pagpanday og bag-ong Batakang Balaod pinaagi sa "People's Initiative" aron mausab gilayon ang porma sa kagamhanan gikan sa Presidential ngadto sa Federal diin tukma nang ma-apud-apod ang bahandi sa nasud hasta ang pagpadagan unya sa kagamhanan.

Managkalahi sab ang bersiyon sa Federalism nga giduso sa pipila ka grupo.

Ang Commission nga gitukod sa administrasyon nagsugyot nga bahinon ang nasud sa 16 ka "Federal States." Naa poy nagsugyot nga gamayon ra kay modaghan na daw kaayo ang suweldohanan sa gobyerno kung daghan ang estado.

Anaa say nagbatikos kay di daw kini haum sa atong nasud ug sakto na ang kasamtangang paagi sa panggamhanan.

Matud pa sa usa ka lider sa Rev Gov nga magsugod daw ang kalihukan sa ilang pundok karong Marso 10 ug hayan madeklara na kuno ang Rev Gov sa wala pa ang "filing of candidacy" sa nasudnong posisyon sa 2022 elections sa Oktubre 2021.

Hala atangan nato ni kay kulbahinam. Congrats na lang daan sa mapili nga mga OIC unya. Unta malinawon ug dili maduguon kini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph