GIPANGANLAN na sa kapulisan ang walo ka mga suspek sa pagpamomba sa Tulunan, North Cotabato niadtong Enero 27, 2021.
Mga suspek mao sila si Kumander Salahudin Hassan, Lutre Aman, Tasly Saligan, Norodrin Haman, Datu Ali Camsa, Sandali Sindatok, Jordan Kamad ug Tahir Abubakar, pulos molupyo sa Datu Paglas, Maguindanao Province.
Mga nahisgutan gitumbok nga mga sakop sa Alkhobar Group, Dawlah Islamiya-Hassan Group sa Bangsamoro Islamic Freedom Fighters.
Kahinumdoman nga natayming sa pagbusikad sa bomba ang paghunong sa usa ka yunit sa Yellow Bus Line hinungdan nga usa ka tawo ang namatay samtang laing unom ang naangol.
Base sa imbestigasyon, improvised explosive device (IED) ang gipabuto sa mga suspek gamit ang Radio-Controlled Improvised Explosive Device (RCIED) o ang wireless command detonation.
Una nang gipasakaan og kaso sa korte ang mga suspek nga hangtud karon padayon pang gipangita sa mga awtoridad.
Pangikil ang nag-una nga motibo sa grupo ni Hassan ngadto sa YBL nga dunay rotang Kidapawan City, Tacurong, Koronadal ug General Santos City.
Tungod sa maong hitabo, mga yunit sa bus sa YBL duna nay mga pulis ang magbantay sa pagbiyahe sa ilang rota, ilabi na gyud sa probinsiya sa North Cotabato. (Edgar E. Fuerzas)