NAGLUMPONG sa selda sa Ecoland Police Station ang tulo ka indibiduwal kinsa nasakpang nagduwa og "tong-its" atol sa ronda sa police station 15 (PS-15) alas 2:30 sa hapon, Dominggo, Marso 7, 2021, didto sa Purok 22-D, Sitio Narra, Kabakan, Ecoland, Brgy 76-A, Davao City.
Subay sa report sa Davao City Police Office (DCPO), naglusad og Anti-Criminality/Terrorism Clearing Operation ang PS-15 gipangunahan sa hepe sa maong istasyon nga si Police Major Carol Jabagat.
Gipang-ila ang mga nahisgutan nga sila alyas Nalyn, 46; alyas Angie, 32, pulos taga Kalubihan, Barangay 76-A ug usa ka Reggie Ybanez Apuya, 38, taga Barangay Ilang, Tibungco, Davao City, kinsa midayo pa gyud sa Ecoland aron makigdula og "tong-its."
Nakuha sa ilang posisyon ang set sa baraha ug P150 nga pusta.
Gipangkustodiya na ang mga suspek samtang giandam ang kaso nga ilang atubangon didto sa korte. (Jeepy P. Compio)