Rekisitos sa mouli, turista sa Lapu-Lapu gipaluagan pa

Gipaluagan og maayo sa Dakbayan sa Lapu-Lapu ang rekisitos sa mga tawo nga mobisita ug mouli sa siyudad.

Sa iyang giluwatang Executive Order No. 2021-011, si Mayor Junard Chan nitangtang sa RT-PCR test, medical certificate, letter of acceptance ug travel authority isip rekisitos alang sa mga Oponganon nga mopauli sa siyudad, authorized persons outside residence (Apor) ug domestic nga mga turista.

Kadtong mga manguli nga overseas Filipinos ug mga langyaw, kinahanglan nga duna silay pre-booked accomodation sa mga hotel o pasilidad diin sila mag-isolate og unom ka mga adlaw.

“The traveler shall undergo RT-PCR test at the hotel/facility on the 6th day from the date of arrival,” matod sa EO ni Chan.

Kon siya negatibo sa test ug makapakitag mga dokumento nga siya nabakunahan na sa anti-coronavirus disease (Covid-19) vaccine, mamahimo na siyang di na motiwas sa iyang isolation.

“However, if the traveller has a negative result but not yet vaccinated, he/she shall be allowed to go home but continue isolating for the remainder of the 14-day quarantine,” dugang sa EO.

KON MAGBISEKLITA

Gitugot sa Siyudad ang pagbiseklita, apan kinahanglan nga ang biker magsul-ob og helmet ug gidili ang pagsul-ob og sapot nga dark aron daling makita.

Gidasig usab ang mga biker sa pagbutang og blinkers ug pagsul-ob og reflectorized vests aron daling makita, labina sa gabii.

“The biker shall only use the rightmost lane or the designated bike lane and strictly comply with existing traffic rules and regulations,” nagkanayon ang EO.

BARANGAY

Gipahugtan usab sa Siyudad ang kampanya batok sa mga di motuman sa mga health protocol sulod sa mga barangay.

Gipatukod ni Chan ang Anti-Covid 19 Barangay Enforcement Unit sa matag barangay.

Langkuban kini sa usa ka police officer, barangay officials, barangay tanod, staff sa Barangay Mayor’s Office (BMO), City Environment and Natural Resources Office (Cenro) ug Solid Waste Management Office (SWMO).

Pinaagi sa pagpahugot sa kampanya sa pagsilot sa mga tawo nga wa motuman sa mga health protocol ug curfew, ang Dakbayan nakasikop og 542 ka mga tawo gikan sa Huwebes, Marso 4 ngadto sa Marso 5, 2021.

Ang Siyudad nagpahamtang og silot sa mga madakpan og P1,000 nga multa ug kon di makabayad, pahimuon og community service human maisyuhan og citation ticket. (REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph