SA DIHANG migawas na ang Covid-19 vaccine, daghan ang mga high-profile personality nga gusto na magpaturok niini apan sukwahi si National Basketball Association (NBA) superstar Lebron James kay di pa kini sigurado kon magpa-bakuna ba.
Gibutyag sa TMZ Sports nga dihang gipangutana ang pambato sa Los Angeles Lakers kon magpabakuna ba kini, wa kini diretso nga mitubag.
Dugang pa sa taho nga ang 36-anyos nga lumad sa Akron, Ohio sa Estados Unidos mohimong pribado sa iyang desisyon kon magpa-vaccine ba kini o dili.
“That’s a conversation that, you know, my family and I will have. And, probably pretty much keep that to a private thing,” matod ni James.
Gipangutana pud si James kon unsa ang iyang sekreto aron magpadayong himsog taliwali niining pandemiya.
Matod pa ni James nga gisunod lang niya ang mga health protocol aron makalikay sa coronavirus.
Dugang pa niini nga mouli dayon siya sa ilang balay human sa ilang mga duwa o mga praktis aron makalikay sa posibleng pagtakod sa Covid-19.
Adunay nangutana kang James atol sa All-Star Game kon irekomendar niya sa National Basketball Players’ Association (NBPA) ang pagpabakuna, ang tubag ni James mao ang giingon ni NBA Commissioner Adam Silver nga kini nga desisyon nagdepende na sa mga magduduwa ug dili kini himuong mandatory.
Si Silver niklaro sa nag-una nga mga interbiyu nga ang pagpabakuna personal nga desisyon sa mga magduduwa ug dili makabuot ang liga niini.
Ang pagpabakuna usa ka mayorihiyang isyu sa Black community ug daghan kanila ang wala mosalig niini.
Apan daghan pud nga mga Black role models ang misuway pagkumbinser sa Black community nga magpabakuna kay luwas kini. (RSC)