Mo-klik kaha ning pelikula nga himuon nilang Bea Alonzo ug Alden Richards?
Ang “Pure Soul” base sa hit TV Korean drama series nga “A Moment to Remember” niadtong 2004.
Apan adaptation sad diay ni sa 2001 hit Japanese TV drama nga “Pure Soul” sad ang taytul nga mao gyuy orihinal nga nagpagawas aning salidaha.
Estorya ni sa batan-ong magtiayon nga niaslum ang relasyon human na-diagnosed ang asawa sa sakit nga Alzheimer’s ug ang makapakumot sa dughan ani kay duna silay anak nga bata pa.
Mismong si Alden nga nagbasa sa script nakahilak kuno. Unsa gud diay. Mao pay daghan na kaayong problema ang atong katawhan tungod aning pandemya unya pahilakon pa gyud ninyo? Di ba wrong timing ning salidaha?
FAKE DIAY?
Taudtaud na kong follower aning Facebook page nga “John Lloyd Cruz” kay updated man kaayo, sama adtong nagpatupi si Loydie ug sa dihang nibisita siya sa Workout Fitness Center sa Cebu ug nag-shooting siya sa Sorsogon.
Ug verified ni sa Facebook nga kang John Lloyd Cruz. Apan sa kalit lang gi-deny ni sa aktor kay wa kuno siyay social media account bisag usa.
Sa kadaghan nang media outlet nga ni-pick-up og estorya ug litrato gikan sa maong account karon ra siya nireklamo human nigawas ang artikulo nga matod pa iyang gitambagan si Joshua Garcia bahin sa iyang career.
Basin naka-realize si Loydie nga kinsa man siya mohatag og advice nga siya gani nagsalimuang pa man.
KAPAMILYA IS BACK
Yey, sugod gahapon makita na sa TV5 ang mga primetime shows sa ABS-CBN sama sa “FPJ’s Ang Probinsyano” ug “PBB Connect.”
Ang nakaparat kay di pa gihapon klaro ang TV5 sa free TV. Mao nay dapat trabahuon sa ABS-CBN kon ganahan silang makabig nila pagbalik ang mga Cebuano sa ilang mga programa.
Grabe ra ba katin-aw ang mga sister channel karon sa GMA nga GTV, Heart of Asia, ug Hallypop nga mora kag nagtan-aw sa cable.
LOVESTORY
Kinsay nakakita sa dihang na-feature sa “Kapuso Mo Jessica Soho” ang lovestory nilang Jasmina ug Bryan?
Si Jasmina mao ang gwapang taga-Finland nga na-in love sa Pinoy nga si Bryan nga parehong naabtan og lockdown sa LapuLapu city tungod sa Covid.
Ako silang na-interbyu ug daghan silang mga rebelasyon nga karon ra nila gibutyag. Inyo ning mabasa karong Huwebes asa pa kundi dinhi sa Laysho sa Ssssuper Ka!