GIPAHINUMDOMAN sa kagamhanan sa Lalawigan sa Sugbo ang mga benepisaryo sa Sugbo Negosyo nga programa sa Kapitolyo sa paggamit na sa coupons pagpalit sa mga gikinahanglan alang sa pag-supply sa negosyo.
Subay sa nasabotan kutob na lang sa Marso 31 ang uwahing adlaw diin mahimo nga makapalit ang mga benepisaryo sa supply niini ngadto sa mga partner nga mga tindahan sa Kapitolyo.
Sulod sa tulo ka buwan nagkasabot usab ang kagamhanan og mga tindahan sa pagpatuman sa price freeze alang sa tanan nga supplies o produkto niini.
Kon mapupos na ang maong higayon sugod sa Abril gipanglantawan ang pagsaka na sa presyo sa mga palaliton, hinungdan nga giawhag ni Cebu Gov. Gwendolyn Garcia ang beneficiaries nga mo angkat na og supply sa dili pa mapupos ang gihatag nga lugway.
Sa talaan sa kagamhanan moabot sa P97,990,000 ang gi gahin alang sa mga benepisyaryo gikan sa opisina sa Bise Gobernador samtang P86,449,620.43 usab ang na utilize sa mga benepisyaryo ubos sa mga bokal.
“So target is March 31 nga mahurot na ni. You better look into kadtong wala pa gyuy withdrawal. Prices are up to March 31 and after that, we might already cut it off kay or else they have to buy it at a higher price,” matod ni Garcia aol sa tigom tali sa Sugbo Negosyo team.
Ang listahan sa mga pangan nga wala makapahimos sa coupon isumiter sa opisina sa Provincial Board members.
Sa kasamtangan nga datos adunay 8,250 ka mga Sugboanon nga nahimong benepisyaryo sa Sugbo Negosyo.
Ang programa gisugdan sa kagamhanan sa probinsya sa Sugbo nga may tumong nga makatabang sa mga Sugboanon pagsugod o pagpadayon sa mga negosyo niini nga naapektahan sa pandemya. (ANV)