WALAY pagsupak ang kapulisan sa Siyudad sa Sugbo kung gitinguha na sa kagamhanan sa dakbayan ang pagtugot na nga makabalik sa operasyon ang game fowl kun sabong sa mga legal nga buwangan.
Ang Cebu City Gamefowl Commission mirekomendar ngadto kang Cebu City Mayor Edgardo Labella pagpaabli sa mga arena kini human nabantayan nga misi-aw ang tigbakayan sa kabarangayan.
Ang mga sugarol nagtagotago na lang sa pagpanugal pinaagi sa pagrisgo sa ilang kaugalingon sa tigbakayan tungod sa paghugot sa seguridad batok sa sugal.
Matod ni Police Lieutenant Colonel Wilbert Parilla, deputy city director for operation sa Cebu City Police Office (CCPO), nga wala siyay nakitang dautan sa maong plano basta adunay pagtugot gikan sa inter agency task force.
Andam nila nga tumanon ang maong mando dungan sa awhag nga tumanon lang ang tanang health protocol sama sa social distancing ug ang kanunay nga pag sul-ob sa mask.
“Ato nang tumanon, but we can also recommend additional measures kung in case ilang ipatuman na sama sa health measures,” matod ni Parilla.
Tanang sabongan sa siyudad ang gipangsirhan tungod sa pandemiya sa Covid-19.
Bisan pa sa pagsaka sa kaso sa Covid-19, apan kinahanglan na nga mobangon ang ekonomiya nga mitibugsok na pag-ayo.
Ang nangusog sa maong tinguha nga si Konsehal Raymond Garcia mibutyag nga ang tugotan lang nga makasulod sa buwangan mao kadtong nagpadagan sa sabong lakip na ang koymi ug ang pamaagi sa sugal diha na sa online.
Walay tugotang makasaksi sa sabong. (AYB)