Dul-an na sa 200,000 ka mga individual ang napaubos sa Covid-19 testing sukad niabot ang coronavirus disease (Covid-19) sa dakbayan sa Sugbo nga adunay 1,000,000 nga populasyon.
Base sa record sa Emergency Operations Center (EOC), niabot na og 195,353 ka mga tawo amh na-test batok sa Covid, diin nikabat og 9.51 percent ang positivity rate.
Niabot og 18,577 ang natakboyan sa maong virus, apan ang 15,009 naka-recover na kun 80.79 percent sa nangasakit samtang 763 kanila ang namatay kun 4.11 percent fatality rate.
Si Konsehal Joel Garganera, deputy chief implementer sa EOC, nagkanayon nga inanay nang nikunhod ang mga kaso sa Covid-19 human nisaka sa unang tulo ka semana sa Pebrero.
Gihangop ni Garganera ang pagsunod sa mga tawo sa gipatuman nga health ug safety protocol hinungdan sa pagkunhod.
Ang Barangay Guadalupe na lang ang nag-three digit sa nakalabay nga 10 ka mga adlaw tungod sa ilang 137 ka mga kaso gikan sa Pebrero 26-Marso 7.
Matod pa ni Garganera nga bisan kon inanay na niubos ang mga kaso apan di gihapon angay mo umpyansa.
Sa kinatibuk-an, ang Cebu City adunay 3,364 ka aktibong kaso nga pulos na naka-isolate.