NAGSUGOD na ang kumbati sa modagan pagka presidente sa piliay sa Mayo 9, 2022. Di na halayo ang sunod nga piliay alang sa mga mokandidato pagka presidente, bise presidente, kongresista, senador, mayor, bise mayor ug mga konsehal. Gani, ang mga hanite nga pulitiko dugay ra nga nagsugod og pangampanya.
Bisan pa sa pagdumili ni Presidente Duterte nga di siya mosugot nga modagan pagka presidente ang iyang unica hija nga si Davao City Mayor Sara Duterte-Carpio tungod kay dili sayon ang trabaho sa presidente, apan nagsige na og papilit sa mga poster nga “Run Sarah Run”. Gani, dihay poster nga gipatangtang sa Cebu City Hall tungod kay way permiso.
Samtang didto si Presidente Duterte sa Cagayan de Oro city atol sa meting sa “national and regional task force to end the local communist armed conflict” (Elcac) daghan ang nakugang ug nahimuot dihang iyang gitawag si Sen. Bong Go nga “Presidente”. Si Senador Go kanunay nga kauban ni Presidente Duterte bisan asa nga kalihokan, nga hangtud karon mora gihapon siya og private secretary sa Presidente.
Nahimong “talk of the town” ang anunsyo ni Presidente Duterte atol niadtong meetiing nga aduna diay siyay kandidato pagka presidente sa sunod nga piliay nga way lain kon dili si Senador Go. Apan si Senador Go, sa iyang pakighinabi sa media, mibalibad nga wala siyay interes modagan pagka presidente. Balibad gyud senador aron di ka hiawayan ni Inday Sarah. Joke!
Ang lain interesado modagan pagka presidente nga morag di na sad mapugngan mao si Sen. Manny Pacquiao, ang kampyonato sa boksing, nga bilyonaro. Gani, sukad sa iyang pag-apil sa pulitika diin nagsugod siya pagka kongresista sa Sarangani hangtud nga midagan siya pagka senador sayon kaayo ang iyang pagdaug. Mao tingali ni iyang barometro nga modagan siya pagka presidente.
Atong mahinumduman nga giagni pud ni Presidente Duterte agi’g komedya, matud pa, si Senador Pacquiao nga modagan pagka presidente. Aw, karon gitinuod ni Senador Pacquiao ang komedya ni Presidente. Hinuon, bisan og mapildi si Pacquiao pagka presidente senador man lang gihapon siya kay duna pa man siyay tulo ka tuig sa sSnado.
Daghan sa akong mga amigo ang nangutana kinsa ang tinuoray nga kandidato ni Presidente Duterte pagka presidente sa sunod piliay? Mao ni usa ka tanghaga nga si Presidente Duterte ra ang nakahibawo sa husto nga tubag. Sa mga suod ni Presidente Duterte morag nakahibawo na sila kinsa ang iyang kandidato.
Sa mga taga Davao City di malalis nga si Mayor Sarah Duterte-Carpio desidido na nga modagan pagka presidente bisan pa sa gipakita nga pagdumili sa iyang amahan. Dunay nagkomedya nga kanang iyang pagtawag ni Sen. Bong Go nga presidente usa lang ka paukyab aron iyang mahibaw-an kinsa ang tinuoray nga dumadapig ni Sarah pagka presidente.
Posible nga uwahi ko sa balita. Pero sa akong pagsusi wala pa man gianunsyo kinsa ang modagan nga bise presidente ni Mayor Sarah. Di ba kaha si Sen. Imee Marcos? Atong atngan!