MI-ALMA ang Associated Labor Union-Trade Union Congress of the Philippines (Alu-TUCP) kabahin sa plano sa ubang mga kompaniya diin adunay silay mga miyembro nga “no vaccine, no work policy.” Buot ipasabot nga kadtong mga empleyado nga dili magpabakuna nga ihatag sa ilang mga kompaniya nga libre posibleng magukod ug mapahamtangan og administrative sanction o ba kaha dili pa-trabahoon. Hinuon, plano pa lang kini.
Samtang katungod sa mga employers o kapitalista ang paghatag og suporta alang sa sakto ug himsog nga panglawas sa ilang mga empliyado apan kining Covid vaccination dili himuon unta nga mandatory o compulsory. O kanang ipamugos ba? Daghan man god ang mga rason nganong dili magpabakuna ang usa ka tawo kontra Covid-19. Wala man gani magpabakuna kanang mga opisyal sa kagamhanan nga maoy gitahasan aning vaccination program. Dili man kaha pinugsanay sa government sector unya sa private ipamugos sa mga employers?
Mismo si Labor Secretary Silvestre Bello 111 mipahimangno nang daan sa mga employer nga dili pugson ang ilang mga empleyado ug dili himuon nga policy ang “no vaccine, no work.” Maayo nga mopakanaog na ang labor department og klarong lagda kabahin niini aron dili magkagubot inig abot sa tukmang panahon.