Sa miaging semana, gi-share sa social media ang video sa usa ka traffic enforcer sa Cebu City Transportation Office (CCTO) nga nangunay pagtapak sa usa ka libaong sa usa ka bahin sa General Maxilom Avenue tungod kay duna nay mga nadisgrasya nga nagmotorsiklo.
Kadto lang usa ka disgrasya sa habagatan sa southern Cebu City nga naglambigit og usa ka babaye nga nagmotorsiklo, libaong ang gituohan sa iyang pagkabunal sa karsada. Kay bisan adlawan, malipat ang driver sa daghan sa mga libaong.
Ang mao nga libaong wa mag-inusara. Dinhi sa Metro Cebu daghan ni, nga bisan gagmay ra, lawom na kaayo. Daghan na ang nangadisgrasya nga two-wheeled nga mga sakyanan tungod sa mga libaong. Maayo ang four-wheeled nga sakyanan ang makayatak kay usapon ra o mopaka lang.
Duna say social media post kalabot sa bike lanes. Kon gitagad man kuno ang bike lanes, nganong ang mga libaong sa mga karsada napasagdan man? Duna say punto ang poster. Kon nahatagan og pagtagad ang bike lanes, nganong napasagdan man ang kahimtang sa mga karsada?
Gimbuhaton man tuod ni sa Department of Public Works and Highways (DPWH), di usab angay nga di na lang manginlabot ang hingtungdang mga local government unit (LGU)? Kay sa matag hitabo, di baya mahuna-hunaan dayon ang DPWH, kon di ang kadagkuan sa mga LGU maoy nagpabaya sa mga mata sa mga tawo.
Di man lisod ang pag-monitor sa mga karsada bisan pag himuon kini kada adlaw. Kay di man maglakaw ang mga kawani nga magsusi kon asang dapita nahimutang ang mga lungag nga kinahanglang tapakan na.
Ang DPWH ug mga LGU magtukod unta og monitoring team, kansang tahas mao lang ang pagsusi sa mga buslot sa mga karsada aron matapakan dayon, di huwaton nga molawom. Di huwaton nga ang lungag makaingon sa pagkaangol o pagkamatay sa motorista. Unsa bay nakalisod sa pagtapak sa libaong?