CALBAYOG CITY, Samar - Unom ang patay ug usa ang naangol sa giingong engkwentro tali sa kapulisan ug sa grupo ni Calbayog City Mayor Ronaldo Aquino pasado alas 5 sa hapon sa Lunes, Marso 8, 2020 sa Labuyao Bridge, Barangay Lonoy ning siyudad.
Managlahi ang opisyal nga report sa kapulisan ug sa mga saksi sa hitabo. Samtang ang kapulisan niingon nga sila ang giunhan sa pagpusil sa grupo ni Aquino, ang mga saksi niingon nga unang nagpabuto ang mga pulis nga sakay sa duha ka mga van.
Sa unom nga nangamatay, usa niini kawani sa Siyudad nga giingong napagan lang atol sa pinusilay.
Sa habig sa kapulisan, ang nangamatay mao sila si Police Captain Joselito Tabada, ug Police Staff Sergeant Romeo Lauyon.
Si Tabada mao ang pangu sa Provincial Drug Enforcement Unit (PDEU) samtang si Lauyon sakop sa Provincial Intelligence Branch (PIB) ug PDEU.
Sa habig ni Aquino, namatay usab si Dennis Abayon, driver sa mayor ug si Police Staff Sergeant Rodeo Sario, bodyguard sa mayor.
Ang namatay kay napagan atol sa pinusilay giilang si Clint John Paul Yauder, kawani sa local government unit ning siyudad.
Si Yauder nagsakay sa ilang Toyota Innova nga gimaneho sa iyang amahan uban usab sa iyang iyaan.
Daling gidala si Yauder sa St. Camillius Hospital sa Calbayog, apan namatay.
Ang naangol mao si Police Staff Sergeant Neil Cebu, sakop sa PNP K9 Unit. Si Cebu daling gidala sa Calbayog Sanitarium Hospital ug dayon gibalhin sa Catbalogan Doctors Hospital.
Ang lawas ni Tabada nakaplagan ilawom sa Labuyao bridge mga alas 10 na sa gabii sa Lunes, apan wa pa matino kon unsa ang hinungdan sa iyang kamatayon.
Sa official report sa Police Regional Office (PRO) 8, ang grupo ni Aquino nga sakay sa puti nga Toyota Hi-Ace van, giingong maoy unang namusil sa duha ka mga van nga gisakyan sa kapulisan.
Nagtuo sila nga nagduda ang grupo sa mayor nga sila gisundan.
Sakay sa duha ka mga van ang mga sakop sa Integrity Monitoring and Enforcement Group (IMEG) ug PDEU.
Sila si Aquino, Abayon, Sario ug Lauyon nangamatay diha-diha atol sa pinusilay.
Atol sa hitabo, daghan ang mga tawo sa dapit.
Mga saksi sa nahitaboan niingon nga ang grupo sa mga pulis maoy unang namusil sa van ni Aquino. Kauban ni Aquino mao lang sila si Abayon ug Sario.
Sa pagsuwat ning taho, wa pay pamahayag ang pamilya ni Aquino. (JKDP)