Gibalik sa pagduaw sa Philippine Drug Enforcement Agency (PDEA 7) ang 15 ka drug surrenderers sa Barangay Lorega San Miguel, Dakbayan sa Sugbo sa Martes sa buntag, Marso 9, 2021.
Ilang gisusi kon wa ba mobalik sa ilang bisyo ug illegal nga negusyo ang mao nga mga awo.
Ang PDEA 7 gipangulohan ni Director Levi Ortiz, inubanan ni Cebu City Office for Substance Abuse Prevention (COSAP) head Jonah John Rodriguez ug Barangay Kapitan Fritzgerald Herrera.
Matod ni Herrera nga sa 200 ka mga drug surrenderer, ilang gipili ang 15 sanglit mga notado na kini sa ilang dapit nga mamaligya ug mogamit usab sa illegal nga drugas.
Giangkon ni Herrera nga kadaghanan sa mga ning-surrender nibalik sa ilang naandan nga bisyo ug namaligya og illegal nga drugas.
Kasagaran, ilabi na niadtong nangadakpan ug nakagawas tungod sa plea bargaining agreement, moadto lang sa barangay aron magpa clear sa ilang ngalan apan dili na mobalik.
“Right now mibalik gyud sila. So mao na ang atong gipangusgan ani kay naa man guy uban nga moadto lang og barangay kay under probation or under plea bargaining. Agreement but after na, dili na magpa ramdam sa barangay,” matod ni Herrera sa Superbalita Cebu.
Ang house-to-house visit maoy kabahin sa programa sa PDEA nga barangay drug clearing program nga gipaningkamotan nga makab-ot sa di pa matapos ang termino ni Presidente Rodrigo Duterte sa 2022.
Niadtong 2016, adunay kapin sa 200 ka mga drug pusher ug users ningtahan sa ilang kaugalingon sa maong barangay ug niangkon nga sila nalambigit sa illegal nga drugas. (AYB, BBT)