ITUGYAN ngadto sa mga barangay ang pagdumala sa mga bike lane nga gipamutang sa kadalanan sa Dakbayan sa Sugbo.
Mao kini ang gibutyag ni Sugbo Bike Lanes Board chairman Gerry Carillo sa interbyu sa Superbalita Cebu.
Matod ni Carillo nga kon mahuman na ang pagbutang sa bike lanes, apil na sa plastic bollards, itugyan kini nila ngadto sa mga barangay nga giagian sa bike lanes.
Kini nga lakang giuyonan usab ni Mayor Edgardo Labella.
We are making a turnover ngadto sa mga barangay. We will be deputizing the barangay to enforce the ordinance. Sila maoy mo enforce, so we will issue authority to them, pagpasabot ni Carillo.
Ang buot ipasabot ni Carillo mao ang Cebu City Ordinance 2408 kun Sugbu Bike Lanes Ordinance nga napasar niadtong 2014 atol sa termino ni Bise Mayor Michael Rama dihang siya pa ang mayor.
Matod ni Carillo nga kinahanglan nga atimanon ang mga bike lane kay kon di, mausik lang ang kahago ug pundo nga gigasto niini nga P76 milyunes.
Ang Siyudad nakakuha og P50 milyunes nga pundo gikan sa Department of Public Works and Highways (DPWH) ug laing P16 milyunes gikan sa Department of the Interior and Local Government (DILG).
Ang board nakakuha usab og P10 milyunes nga gahin gikan sa Cebu City Council.
Ang mga bike lanes nato mausik lang kay himuon mang parkinganan. Anha diha maninda, vulcanizing, car wash. Mao nay mahitabo sa atoang bike lanes, dugang ni Carillo.
Iyang gidasig ang matag barangay sa pagpasar og kaugalingong ordinansa nga magtakda og mga multa sa makalapas sa bike lanes ordinance sa ingon mokita usab sila sa mga penalty nga ipahamtang alang sa mga makalapas.
Sa pagkakaron, ang mga multa: P1,000 sa unang paglapas; P1,500 sa ikaduha ug P2,000 alang sa ikatulo. Gusto ni Carillo nga padak-an kini hangtod sa P3,000 pinaagi sa pag-amendar sa ordinansa.
Matod ni Carillo nga nagkasabot sila sa Cebu City Transportation Office (CCTO) nga bansayon ang mga barangay personnel, labina ang mga tanod, sa pagbantay sa bike lanes.
Iya usab nga gidasig ang publiko nga kuhaan og hulagway ang si bisan kinsa nga mo-park sa mga bike lane ug ipadala sa Facebook Messenger sa Sugbo Bike Lanes Board aron ilang maaksyunan.
Gibana-bana ni Carillo nga moabot og 70 kilometros ang bike lanes loop nga sa di madugayan ilang butangan og plastic bollards aron di parkingan sa four-wheeled nga mga sakyanan.